بورسد کی نگینہ مسجد کے امام سید احسان علی اشرفی مصباحی نے کہا کہ آج کے دور میں مسلمان الوداع جمعہ اور عید کی نماز کیسے ادا کریں یہ بہت بڑا سوال پیدا ہو گیا ہے، ایسے میں لوگوں سے کہنا چاہتا ہوں کہ مجبوریوں کی وجہ سے آج مساجد کے دروازے بند ہیں ایسے میں لوگ اپنے گھروں میں نماز ادا کر رہے ہیں اور اب جب شب قدر آنے والی ہے تو اس رات میں خاص طور سے نوافل کی نماز ادا کریں شکرانے کی نماز ادا کریں اور تہجد اور اشراق کی نماز ادا کریں۔
انہوں نے کہا کہ عید کی نماز کے بجائے چاشت کی نماز ادا کریں۔ ساتھ ہی تکبیر کی صدائیں بھی بلند کریں۔ وہ تکبیر جس کا عیدین میں حکم ہے۔
انہوں نے مزید کہا کہ آج تک دیکھا گیا کہ عیدالفطر کی نماز عید گاہ مساجد اور بڑی درگاہوں میں ادا کی جاتی تھی لیکن مساجد بند ہونے کی وجہ سے عیدالفطر کی نماز کے بجائے چاشت کی نماز گھروں میں ادا کی جائے اور لاک ڈاؤن کا عمل کیا جائے عید کے دن بھی پوری طرح سرکاری ہدایت پر عمل کرتے ہوے عید منائیں۔
