ریاست گجرات کے دارالحکومت احمدآباد ائیرپورٹ سے اندرا بریج تک نئی تعمیر شدہ دیوار کے پیچھے جھگیوں میں زندگی بسر کرنے والے غریبوں سے ملاقات کرنے گجرات این سی پی کے صدر شنکر سنگھ واگھیلا پہنچے۔
اس موقع پر شنکر سنگھ واگھیلا نے کہا کہ میں نے چین کی دیوار دیکھی ہے اس کے بعد آج یہ دوسری دیوار ٹرمپ کے آنے سے پہلے غریبوں کو چھپانے کے لیے کھڑی ہوئی دیکھی جس سے صاف ظاہر ہوتا ہے کہ حکومت اپنی ناکامی کو چھپانے کے لیے نئے نئے طریقہ آزما رہی ہے۔
بی جے پی حکومت غریبوں کو دیوار میں چھپانے کا کام کر رہی ہے ہم دیوار کے مخالف نہیں ہے لیکن حکومت کو چاہیے کہ ان غریبوں کو مکان دے ان کے پریشانیاں حل کرے نہ کہ ان کے ٹیکس کے پیسوں کو برباد کرے، کسان خودکشی کر رہے ہیں، جگہ جگہ پر احتجاجی مظاہرے ہو رہے ہیں لیکن بی جے پی حکومت عوام کا پیسہ برباد کررہی ہے۔
انہوں نے کہا کہ گجرات میں گزشتہ 22برس سے بی کے پی کی حکومت ہے اور مرکز میں بھی بی جے پی بر سراقتدار ہے ایسے میں وکاس کے نام پر کھوکھلی تشہیر اور ناکام سرگرمیوں کی وجہ سے آج عوام پریشان حال ہوگئی ہے اور امریکی صدر ڈونلڈ ٹرمپ کے دورے کے دوران بھارت کی غریبی سامنے نہ آجائے جس کے لیے فوراً دیوار تعمیر کردی گئی اور ریاست کی ناکامیوں کو چھپانے کا کام کیا جا رہا ہے۔
واضح رہے کہ امریکی صدر ڈونلڈ ٹرمپ اور ان کی اہلیہ ملینیا ٹرمپ 24 اور 25 فروری کو دو روزہ بھارت کے دورہ پر آنے والے ہیں، جس کے لیے گجرات کی ریاستی حکومت نے احمدآباد ایئرپورٹ کے راستے میں موجود جھگیوں کو ٹرمپ کی نگاہوں سے چھپانے کے لیے دیوار تعمیر کرائی گئی ہے۔
