سرکاری ذرائع نے بتایا کہ ڈاکٹروں نے روپانی کا ٹیسٹ کیا ہے اور وہ مکمل صحت مند ہیں۔ وہ احتیاطاً کم از کم ایک ہفتے تک الگ تھلگ رہیں گے۔
واضح ہو کہ احمدآباد کے جمال پور کھاڈیہ حلقے سے کانگریس کے رکن اسمبلی عمران کھیڑاوالا اور دو دیگر اراکین اسمبلی نے وزیر اعلیٰ روپانی سے گزشتہ روز ان کی رہائش گاہ پر ملاقات کی تھی۔ اس سے پہلے انہوں نے کورونا ٹیسٹ کے لیے نمونے دے رکھے تھے۔ شام کو ان کی رپورٹ مثبت آئی اور انہیں کورونا متاثر پایا گیا۔ انہیں احمدآباد کے سردار پٹیل اسپتال میں داخل کروایا گیا ہے۔
اس میٹنگ میں کانگریس کے رکن اسملبی غیاث الدین شیخ، اسمبلی میں پارٹی کے ڈپٹی لیڈر شیلیش پرمار، ریاست کے نائب وزیر اعلیٰ نتن پٹیل اور وزیر مملکت پردیپ جڈیجہ بھی موجود تھے۔ کھیڑا والا نے میٹنگ کے بعد صحافیوں سے گفتگو بھی کی تھی۔
وزیر اعلیٰ کے دفتر کے ذرائع نے بتایا کہ میٹنگ میں کھیڑا والا سے روپانی، نائب وزیر اعلیٰ اور دیگر وزیر تین سے چار میٹر کی دوری پر بیٹھے تھے۔
