محرم الحرام کی 7 تاریخ کو کربلا میدان میں امام حسینؓ اور ان کے 72 ساتھیوں کے لیے یزید کی فوج نے پانی کو بند کردیا تھا۔ اسی دن سے شہادت کے ایام کی شروعات ہوتی ہے۔ ہر سال اس دن کی مناسبت سے امام بارگاہوں میں مجالس و عزاداری کی جاتی ہے اور علم کی سواری نکالی جاتی ہے۔
اس تعلق سے سینٹرل تعزیہ کمیٹی گجرات کے چیئرمین پرویز مومن نے کہا کہ جمال پور میں موجود بڑا امام باڑہ، گجرات کا سب سے قدیم امام باڑہ ہے۔ آج محرم کے ساتویں چاند کے موقع پر ہر سال کی طرح اس سال بھی امام باڑے میں مجلس، نوحہ خوانی، علم مبارک کی سواری اور عزاداری کی گئی۔ انہوں نے کہا کہ اس سال کورونا گائڈ لائنز پر سختی سے عمل کرتے ہوئے تمام پروگرامز کا اہتمام کیا گیا۔
اس موقع پر موجود عقیدت مندوں نے کہا کہ ہر سال بڑی تعداد میں عقیدت مند عزاداری اور مجالس میں شرکت کیا کرتے تھے لیکن کورونا وبا کے سبب، اس سال بارگاہوں میں بہت کم لوگوں کو آنے کی اجازت دی جارہی ہے اور کورونا ضوابط پر عمل کرتے ہوئے احمدآباد کے امام باڑوں میں بھی مجالس، ماتم و نوحہ خوانی کا اہتمام کیا جارہا ہے۔
یہ بھی پڑھیں: احمدآباد میں اس سال بھی محرم کے جلوس برآمد نہیں ہوں گے
واضح رہے کہ رواں برس گجرات حکومت نے محرم کے جلوس نکالنے پر پابندیاں عائد کی ہے جب کہ تمام تقاریب کو سادگی سے امام بارگاہوں میں منعقد کیا جارہا ہے۔
