ریاست گجرات میں کرجن کے رکن اسمبلی (ایم ایل اے) اکشے پٹیل نے کانگریس پارٹی سے استعفیٰ دیے دیا ہے، اکشے پٹیل کچھ عرصے سے مبینہ طور پر کانگریس کی قیادت سے ناراض تھے اور استعفے کی خبر آنے کے بعد اکشے پٹیل نے اپنا موبائل بند کر دیا ہے۔
اکشے پٹیل کے بعد کانگریس کے مزید پانچ اراکین کے کانگریس پارٹی سے علیحدگی اختیار کرنے کی قیاس آرائیاں کی جا رہی ہیں۔
ذرائع کے مطابق اکشے پٹیل کے بعد کانگریس پارٹی سے وابستہ کپراڈا کے ایم ایل اے جیتو چودھری، ڈھسرا کے ایم ایل اے کانتی سوڈا پرمار، پاٹن کے ایم ایل اے کرٹ پٹیل، پالن پور کے ایم ایل اے مہیش پٹیل اور بھلاڑا کے ایم ایل اے انل جوشی ممکنہ طور عنقریب علیحدہ ہو سکتے ہیں۔
ان تمام باتوں کی اٹکلوں کے درمیان اپوزیشن لیڈر پریش دھانانی نے ایک ٹویٹ کر کے بی جے پی پر نشانہ سادھا ہے، پریش دھانانی کے ٹویٹ سے ظاہر ہوتا ہے کہ کانگریس بالواسطہ طور پر ٹوٹ رہی ہے۔
پریش دھانانی نے ٹویٹ میں لکھا ہے کہ ’’اب کمل کی کمائی سے شروع کر دی گئی ہے ایم ایل ایز کو خریدنے کی دکان؟ #گجرات بچاؤ ابھیان۔‘‘
