نئی دہلی: ریٹنگ ایجنسی موڈیز نے کورونا سے متاثر معیشت کے پٹری پر آنے اور اس مہلک وائرس کے لیے ٹیکہ آنے سے ملک کی معاشی صورتحال میں بہتری کی امید ظاہر کرتے ہوئے کہا ہے کہ آئندہ مالی برس میں بھارت کی شرح نمو 13.7 فیصد تک بڑھ سکتی ہے۔
انہوں نے کہا کہ کورونا وبا کے سبب متاثر معیشت کے پٹری پر لوٹنے اور وائرس سے نمٹنے کے لیے موثر ویکسین کے آنے سے معاشی صورتحال میں بہتری کے اشارے دکھائی دے رہے ہیں۔
موڈیز نے آئندہ مالی برس 2021-22 کے لیے بھارت کی شرح نمو کے تخمینے پر نظر ثانی کی ہے۔ اس کے مطابق اگلے مالی برس میں بھارتی معیشت 13.7 فیصد شرح سے بڑھے گی۔ اس سے قبل موڈیز کا تخمینہ تھا کہ 2021-22 میں بھارت کی اقتصادی ترقی کی شرح نمو 10.8 فیصد رہے گی۔ مارکٹ میں بڑھتے اعتماد اور کورونا ویکسینیشن کے آغاز کے سبب موڈیز نے اپنے تخمینے پر نظرثانی کی ہے۔
اس نے رواں مالی برس کے تخمینے پر بھی نظر ثانی کی ہے۔ اب بھارتی معیشت میں 7 فیصد کی گراوٹ آنے کی امید ظاہر کی گئی ہے جبکہ پہلے اس کے 10.6 فیصد رہنے کی بات کہی گئی تھی۔
موڈیز کی انویسٹرس سروس کے ایسوسی ایٹ کے منیجنگ ڈائریکٹر (سوورین رسک) جین فینگ نے کہا کہ اقتصادی سرگرمیوں کو معمول پر آنے اور بیس فیکٹ کی وجہ سے تخمینے پر نظر ثانی کی گئی ہے۔ موڈیز اور انڈیپنڈنٹ کریڈٹ ریٹنگ ایجنسی کے زیر اہتمام انڈیا کریڈٹ آؤٹ لک 2021 پر منعقد ایک آن لائن پروگرام میں مسٹر فینگ نے کہا کہ ویکسینیشن پروگرام شروع ہونے اور مارکٹ میں بڑھتے اعتماد کے سبب معاشی سرگرمیاں معمول پر آ رہی ہیں۔
یواین آئی
