نئی دہلی: مرکزی وزیر خزانہ نرملا سیتارمن نے کورونا وبا کی وجہ سے سست پڑ رہی معیشت کو رفتار دینے کے لیے صحت، سیاحت، زراعت اور روزگار کے شعبہ میں 6.28 لاکھ کروڑ روپے کی سرمایہ کاری اور نئی اصلاحات اور رعایتوں کا اعلان کیا ہے۔
انہوں نے کہاکہ حکومت کورونا وبا کے خلاف لڑائی میں بھارتی معیشت کو مضبوطی فراہم کرنے کے لیے 6,28,993کروڑ روپے کا مراعاتی پیکج دیا جائے گا۔ اس موقع پر وزیر مملکت برائے خزانہ انوراگ ٹھاکر بھی موجود تھے۔
وزیر خزانہ نے کہاکہ حکومت کورونا وبا سے نٹپنے کے لے صحت کا بنیادی ڈھانچہ مضبوط کرے گی۔ اس کے لیے بڑے پیمانہ پر سرمایہ کاری کی جائے گی۔ ملک کے درمیانہ سطح کے شہروں میں صحت ڈھانچہ کو مضبوط کیا جائے گا۔
مرکزی وزیر خزانہ نے کہا کہ حکومت نے 1.1لاکھ کروڑ روپے کا فنڈ ’کریڈٹ گارنٹی یوجنا‘ کے لیے مختص کیا ہے۔ کووڈ سے متاثرہ علاقوں کو اس سے مد د ملے گی۔آٹھ بڑے شہروں کو چھوڑ کر دوسرے شہروں میں صحت بنیادی ڈھانچہ کے لیے حکومت پچاس ہزار کروڑ روپے خرچ کرے گی۔ اس کے تحت حکومت کم سود پر قرض دستیاب کرائے گی۔ اسکیم کے تحت 100کروڑ روپے کا زیادہ سے زیادہ قرض ہوگا۔ اس قرض پر حکومت کی گارنٹی بھی ہوگی۔ بجلی شعبہ میں 3.03 لاکھ کروڑ روپے کی سرمایہ کاری ہوگی۔
- مزید پڑھیں: طبی انفراسٹرکچر سمیت کئی شعبوں کے لیے قرض کا اعلان
- پلوامہ: قربانی کے جانوروں پر لاک ڈاؤن کی مار
سیتارمن نے کہاکہ حکومت نے بجلی کے شعبہ میں اصلاحات کے لیے بھی اقدامات کیے ہیں۔ اس کے لیے اسمارٹ میٹر لگانے پر زور ہوگا۔ بچوں کے لیے ہسپتالوں میں سہولیات میں اضافہ کے لیے 23ہزار 220کروڑ روپے کی سرمایہ کاری کرے گی۔ اس کے تحت بچوں کے لیے آئی سی یو بیڈ سمیت دیگر سہولیات بنائی جائیں گی۔ یہ رقم اگلے برس 31مارچ تک خرچ ہوگی۔ گزشتہ برس بھی حکومت نے ہسپتالوں میں سہولیات میں اضافہ کرنے کے لیے 15000کروڑ روپے کا انتظام کیا تھا۔
مرکزی وزیر نے کہا کہ کریڈ ٹ گارنٹی اسکیم کے تحت 1.5لاکھ کروڑ روپے کے فاضل قرض کا انتظام کیا گیا ہے۔ کریڈٹ گارنٹی اسکیم سے 25لاکھ چھوٹے کاروباریوں کو اس کا فائدہ ملے گا۔ اس کی مدت زیادہ سے زیادہ تین برس ہوگی۔ اس کا فائدہ 31مارچ 2022تک اٹھایا جاسکتا ہے۔
سیتارمن نے کہاکہ سیاحت کے شعبہ میں ٹورسٹ گائیڈ اور اس طرح کے دوسرے لوگوں کی مدد کی جائے گی۔ اس کا فائدہ 11000 ٹورسٹ گائڈ کو ملے گا۔ ایک لاکھ روپے تک کی مدد ٹورسٹ گائڈ کو دی جائے گی۔ ٹورسٹ ایجنسی کو دس لاکھ روپے تک کی مدد دی جائے گی۔
بھارت آنے والے پہلے پانچ لاکھ ٹورسٹ ویزا کی فیس نہیں دینی پڑے گی۔ یہ اسکیم اگلے سال 31مارچ تک جاری رہے گی۔ اس پر کل ملاکر 100کروڑ روپے خرچ ہوں گے۔
ویزیر خزانہ سیتارمن نے کہاکہ حکومت کسانوں کی آمدنی دو گنا کرنے پر توجہ دے رہی ہے۔ اس کے لئے مزید غذائی اجزاء کے ساتھ بایو فصل تیار کرنے لئے کام جاری ہے۔اس سے غذائی قلت کے مسئلہ کو حل کرنے میں مدد ملے گی۔ اس کے لئے اناج کی 21اقسام تیار کی گئی ہیں۔
شمال مشرقی ریاستوں کے کسانوں کے لیے 70.45کروڑ روپے کا پیکج دیا گیا ہے۔ اس سے شمال مشرقی ریاستوں کے کسانوں کوفصل کی اچھی قیمت مل سکے گی۔ اس کے لیے اس رقم سے بنیادی سہولیات میں بہتری آئے گی۔
وزیر خزانہ نے ایکسپورٹ کو فروغ دینے کے لیے بھی 33ہزار کروڑ روپے کی مدد دینے کا اعلان کیا۔ انہوں نے کہاکہ ڈیجیٹل انڈیا کے تحت تمام گاووں کو براڈ بینڈ کے تحت لایا جائے گا جس میں 19041کروڑ روپے خرچ ہوں گے۔ اس سے ان گاووں کو بھی انٹرنیٹ سے جوڑ دیا جائے گا۔ بھارت نیٹ کے پی پی پی ماڈل کے تحت 16ریاستوں میں اسکیم کو نافذ کیا جارہا ہے۔
حکومت نے پیداوار پر مبنی مراعات۔پی ایل آئی اسکیم کی مدت میں ایک برس کی توسیع کردی ہے۔اب یہ اسکیم پانچ برس کے لیے ہوگی۔ اس کے تحت ملک میں مصنوعات کی تیاری پر کمپنیوں کو راحت دی جاتی ہے۔گزشتہ برس بھی حکومت نے مضبوطی فراہم کرنے کے لئے 20لاکھ کروڑ روپے کے پیکج کا اعلان کیا تھا۔
یو این آئی
