دیہی بینک ملازمین 16-15 مارچ کو ہڑتال کریں گے

یونائیٹیڈ فورم آف آر آر بی یونینز کے ترجمان شیوکر دویویدی نے بدھ کو بتایا کہ 15 اور 16 مارچ کو حکومت کی نجکاری تجویز کے خلاف سبھی بینک اور بیمہ اداروں میں کام کرنے والے ملازمین ہڑتال پر جارہے ہیں۔

نئی دہلی: عوامی شعبہ کے چار بینکوں کی نجکاری کی مخالفت میں اور 11 ویں پے کمیشن معاہدے کو مکمل طورپر علاقائی دیہی بینکوں میں نافذ کیے جانے جیسے مطالبات کے سلسلے میں ملک بھر کے دیہی بینکوں کے ملازمین بھی 15 اور 16 مارچ کو ہڑتال پر رہیں گے۔
یونائیٹیڈ فورم آف آر آر بی یونینز کے ترجمان شیوکر دویویدی نے بدھ کو بتایا کہ 15 اور 16 مارچ کو حکومت کی نجکاری تجویز کے خلاف سبھی بینک اور بیمہ اداروں میں کام کرنے والے ملازمین ہڑتال پر جارہے ہیں۔ اس احتجاج کو دیہی بینک اہلکار بھی اپنی حمایت دیتے ہوئے اپنے دیگر مطالبات کے ساتھ ہڑتال میں شامل ہوں گے۔
انہوں نے بتایا کہ پچھلے ماہ یونائیٹیڈ فورم عہدے داروں کی میٹنگ میں یہ فیصلہ کیا گیا کہ دیہی بینک اہلکار بھی عوامی شعبہ کے بینکوں کی نجکاری کی مخالفت میں اور اپنے اہم مطالبات کے سلسلے ہڑتال پر جائیں گے۔ اس سلسلے میں ہڑتال کا نوٹس سکریٹری بینکنگ محخمے کو بھیجا گیا ہے۔
ملک میں کُل ملاکر 43 دیہی بینک 26 ریاستوں اور تین مرکز کے زیر انتظام علاقوں میں چل رہے ہیں۔ ان بینکوں کی 685 اضلاع میں تقریباً 22 ہزار برانچز ہیں جن میں تقریباً ایک لاکھ افسر اور اہلکار تعینات ہیں۔ یہ سبھی مرکزی سطح کی دس ٹریڈ یونینس سے وابستہ ہیں۔
یواین آئی