رواں برس فروری میں پلوامہ میں ہوئے دہشت گردانہ حملوں کے بعد دونوں ممالک کے درمیان کشیدگی بڑھ جانے سے پاکستان نے اپنی فضائی حدود میں بھارتی طیاروں کے داخلے پر پابندی عائد کردی تھی۔
لیکن پاکستان نے گزشتہ روز سے یہ پابندی ہٹادی ہے سرکاری طیارہ خدمات کمپنی ایئر انڈیا کے طیارے آج رات سے ہی پاکستانی حدود سے گزرنے شروع ہوجائیں گے۔
ایئر انڈیا کے ترجمان دھننجے کمار نے بتایا کہ پاکستان کی جانب سے پابندی ہٹانے سے قبل امریکہ اور یوروپ جانے والے طیاروں کو سیدھے جانے کے بجائے جنوب کی جانب سے بھیجا جارہا تھا۔
لیکن اب پرانے راستے پر پروازیں جانے سے سفر کے اوقات میں ڈیڑھ گھنٹے کی بچت ہوگی۔ اس کے علاوہ امریکہ جانے والے طیاروں کو ویانا میں رکنا پڑتا تھا جہاں پائلٹ دستہ تبدیل کردیا جاتا تھا جس میں تین گھنٹے کا وقت لگتا تھا، اس طرح اب کل ساڑھے چار گھنٹے کی بچت ہوگی۔
انہوں نے بتایا کہ پرواز کا وقت کم ہونے کے سبب ایندھن اور پائلٹ عملے کے ارکان کی ضرورت بھی کم ہوجائے گی اور طیاروں کا استعمال بھی زیادہ بہتر طریقے سے ہوسکے گا۔ اس سب سے امریکہ جانے والی پروازوں پر ایک طرف کے سفر میں تقریباً 20 لاکھ روپے اور یوروپ جانے والی پروازوں میں تقریباً پانچ لاکھ روپے کی بچت کا اندازہ ہے۔
