ترنمول کانگریس الیکشن کمیشن سے ملاقات کی خواہاں

ترنمول کانگریس نے کولکتہ میں امت شاہ کے روڈ شو کے دوران تشدد کے مسئلے پر الیکشن کمیشن سے ملاقات کے لیے وقت طلب کیا ہے۔

کولکتہ میں کل امت شاہ کے روڈ شو کے دوران بی جے پی اور ترنمول کانگریس کے حامیوں کے درمیان جھڑپیں ہوئیں جس کی وجہ سے صدر بی جے پی کو اپنا روڈ شو مختصر کرنا پڑا۔
ترنمول کانگریس کی سربراہ ممتا بنرجی نے کہا کہ بی جے پی نے پہلے سے منصوبہ بندی کی اور کولکتہ یونیورسٹی کیمپس پر حملہ کےلیے باہر سے غنڈوں کو لایا تھا اور تشدد پھیلاتے ہوئے بنگالی تہذیب کے معروف فلسفی ایشور چندر ودیاساگر کے مجسمے کو توڑ دیا۔
برہم ممتا نے وارننگ دیتے ہوئے کہا کہ ودیاساگر کے مجسمے کو توڑنے والے اور کالج کی املاک کو نقصان پہنچانے والوں کو بخشہ نہیں جائے گا۔
وہیں بی جے پی صدر امت شاہ نے روڈشو کے دوران تشدد کےلیے ترنمول کانگریس کو ذمہ دار ٹھہرایا۔ انہوں نے الزام لگایا کہ ممتا بنرجی نے اپنے کارکنوں کو تشدد پر اکسایا ہے۔