چھتیس گڑھ اور بہار میں ماؤنوازوں کے حوصلے بلند

ریاست چھتیس گڑھ اور بہار میں ماؤنوازوں کے حوصلے اتنے بلند ہیں کہ سکیورٹی کے سخت انتظامات کے باوجود وہ ووٹنگ میں رخنہ اندازی کرنے کی کوششیں کر رہے ہیں۔

کہیں ٹفن بم تو کہیں ماؤنوازوں نے پرچے چسپاں کر کے انتخابات کو متاثر کرنے کی کوشش کی ہے۔

ایک طرف چھتیس گڑھ میں جہاں نکسلیوں نے انتخابات کا بائیکاٹ کرنے کی عوام سے اپیل کی ہے۔ وہیں بہار میں ٹفن بم کے ذریعہ لوگوں کو ہراساں کرنے کی کوشش کی۔

نکسلیوں نے عام انتخابات کا بائیکاٹ کرنے کے لیے دنتیواڑہ ضلع کے کوا کونڈا بلاک کے ہالبارام پولنگ مرکز پر کافی تعداد میں بینر پوسٹر لگائے ہیں اور عوام سے پولنگ کا بائیکاٹ کرنے کی اپیل کی ہے۔

بڑی تعداد میں علاقے میں ماؤنوازوں کے موجود ہونے کی خبر ہے۔ اس کے پیش نظر سکیورٹی کے پختہ ترین انتظامات کیے گئے ہیں اور سرچ آپریشن بھی شروع کردیا گیا ہے۔

بہار میں ٹفن بم ملنے سے سراسیمگی پھیل گئی تاہم بم کو جلد ہی ناکارہ کردیا گیا۔ پولیس پورے معاملے کی تفتیش کررہی ہے۔ خبر لکھے جانے تک کسی طرح کے جانی و مالی نقصانات کی اطلاع نہیں ہے