بھارت سمیت دنیا بھر میں یوم خواتین منایا جارہا ہے

آج دنیا بھر میں یوم خواتین منایا جارہا ہے، اس دن کا مقصد خواتین کی سماجی، سیاسی اور اقتصادی جدوجہد کو خراج تحسین پیش کرنا ہے۔

خواتین کی معاشرے میں اہمیت بتانے کے لیے جہاں دنیا بھر میں عالمی یوم خواتین کا جشن منایا جاتا ہے، تو وہیں خواتین نے ثابت بھی کیا ہے کہ ان کی شمولیت کے بغیر کوئی بھی معاشرہ ترقی کی راہ پر گامزن نہیں ہوسکتا۔

عالمی دن منانے کے موقع پر ان بہادر خواتین کو خراج تحسین پیش کیا جاتا ہے جنہوں نے اپنے حق کی جنگ لڑی، اس دن دنیا بھر میں مختلف ممالک کی ہزاروں تنظیمیں خواتین کی سماجی، سیاسی اور اقتصادی ترقی کی کوششوں کو اجاگر کرنے کے لیے واکس اور تقاریب، سیمینارز اور مباحثوں کا اہتمام کرتی ہیں۔

یوم خواتین کے موقع پر دنیا کے مختلف ممالک مثلاً روس، ویت نام، چین اور بلغاریہ میں یوم خواتین پر عام تعطیل ہوتی ہے، یہ دن خواتین کی 'جدوجہد' کی علامت ہے۔

سنہ 1908 میں 15ہزار محنت کش خواتین نے تنخواہوں میں اضافے، ووٹ کے حق اور کام کے طویل اوقات کے خلاف نیویارک میں احتجاج کیا اور اپنے حقوق کے حصول کے لیے آواز بلند کی۔

سنہ 1909 میں امریکہ کی سوشلسٹ پارٹی کی طرف سے پہلی بار عورتوں کا قومی دن 28 فروری کو منایا گیا۔