'اللہ میرے بھائی کی مغفرت کرے'

ترک صدر رجب طیب ایرودوان نے فوت شدہ سابق مصری صدرمحمد مرسی کو خراج عقیدت پیش کیا اور کہا کہ وہ ان کی مغفرت کے لیے دعا گو ہیں۔

انہوں نے محمد مرسی کی وفات کے بعد میڈیا سے بات چیت میں کہا کہ ' سب سے پہلے میں اللہ سے دعا گو ہوں کہ وہ ہمارے بھائی کی مغفرت کرے۔ محمد مرسی جمہوری اقدار کے ساتھ 52 فیصد ووٹ حاصل کرکے صدر بنے تھے لیکن سفاک حکمراں نے انہیں برطرف کردیا اور بغاوت کرکے صدر بن گئے۔ آپ جانتے ہیں کہ انہوں نے 50 مصریوں کو پھانسی دی۔'

گذشتہ روز 67 برس کے محمد مرسی عدالتی کارروائی کے بعد بے ہوش ہوگئے اور کچھ دیر بعد انتقال کر گئے۔

عدالتی ذرائع کا کہنا تھا کہ وفات سے قبل محمد مرسی نے جج سے تقریباً 20 منٹ تک بات کی، اس کے بعد وہ بے ہوش ہوگئے جس پر انہیں ہسپتال لے جایا گیا جہاں وہ دم توڑ گئے۔

اخوان المسلمین کے اہم رہنما محمد مرسی کی حکومت کے خلاف بڑے پیمانے پر عوامی مظاہوں کے بعد 2013 میں فوج نے ان کی حکومت کا تختہ الٹ دیا تھا، جس کے بعد عبد الفتاح السیسی صدر بن گئے۔

سیسی کے دور میں تنظیم کے خلاف کریک ڈاؤن کرتے ہوئے محمد مرسی اور کئی رہنماؤں کو گرفتار کر لیا گیا تھا۔

محمد مرسی مصر میں کئی دہائیوں تک حکمرانی کرنے والے حسنی مبارک کی حکومت کا تختہ الٹنے کے بعد 2012 کے پہلے آزاد صدارتی انتخاب میں صدر منتخب ہوئے تھے اور معزولی کے بعد کئی کیسز میں سزا کاٹ رہے تھے۔