معروف اسلامی دانشگاہ دارالعلوم دیوبند سے شائع ہونے والے عربی زبان کے رسالے"الداعی"کے مدیراعلی اور ممتاز صحافی نیز عربی زبان و ادب پر یدطولی رکھنے والی معروف شخصیت مولانا نور عالم خلیل امینی کو عربی زبان و ادب میں مہارت کے لیے صدر جمہوریہ ایوارڈ سے نوازا گیا ہے۔
دارالعلوم کے موقر استاذ کو صدر جمہوریہ ایوارڈ سے نوازے جانے پر دارالعلوم کی انتظامیہ، مدرسے کے اساتذہ اور طلبہ نیز شہر کی تمام بڑی ہستیوں نے مبارکباد پیش کی ہے اور اپنی خوشی کا اظہار کیا ہے۔
قومی دارالحکومت دہلی میں واقع راشٹرپتی بھون میں جمعرات کو صدر رام ناتھ کووند کے ذریعے الگ الگ زبان میں مہارت رکھنے والی شخصیات کو صدر جمہوریہ ایوارڈ سے نوازا گیا۔ اس اعلی ترین ایوارڈ سے نوازی گئی شخصیات میں دارالعلوم سے نکلنے والے عربی زبان کے موقر رسالے کے مدیر اعلی مولانا نور عالم امینی کا نام بھی شامل ہے۔ صدر کے ہاتھوں سے دارالعلوم کے استاذ کو ملی تحریر میں لکھا ہے کہ، 'میں بھارت کا صدر رام ناتھ کووند نورعالم امینی کو عربی زبان میں مہارت حاصل کرنے اور ادب میں گراں قدر خدمات کے اعتراف میں اس باوقار ایوارڈ سے نوازنے کی سعادت حاصل کر رہا ہوں'۔
دارالعلوم کے موقر استاذ کی عزت افزائی پر مدرسے کی انتظامیہ اور مدرسے سے جڑے اساتذہ، طلباء اور شہر کی تمام بڑی ہستیوں نے خوشی کا اظہار کیا ہے۔ اور مولانا نور عالم امینی کو مبارکباد پیش کی ہے۔
خیال رہےکہ مولانا نور عالم خلیل امینی کا تعلق بہار کے ضلع مظفرپور کے گاؤں ہر پوربیشی سے ہے ۔آپ کئی دہائیوں سے دارالعلوم دیوبند میں تدریسی اور دارالعلوم سے نکلنے والا عربی مجلہ الداعی کی ادارتی ذمہ داری سنبھال رہے ہیں۔ درجنوں عربی اور اردو زبان میں لکھی گئی آپ کی تصنیفات کافی مشہور اور شامل نصاب ہیں۔ مولانا کے مضامین بہت ہی معلوماتی اور تحقیقی ہوتے ہیں، زبان و بیان میں سلاست، تنوع اور اسلوب میں ایسی چاشنی ہوتی ہےکہ قارئین پڑھنے پر مجبور ہوتے ہیں۔
