ختمِ بخاری شریف کا پروگرام

اترپردیش کے ضلع سہارنپور دیوبند میں شب برأت کے موقع پر جامعہ امام محمد انور شاہ میں ختم بخاری شریف کی شاندار تقریب کا انعقاد عمل میں آیا۔

اس موقع پر مہتمم جامعہ مولانا احمد خضر شاہ مسعودی نے کہا کی مدارس نے ہمیشہ سچے اور امن پسند انسان پیدا کیے ہیں، اور مدارس ہمیشہ نیک راہ دکھاتے آئے ہیں اور یہاں سے نکلنے والے طلبا علم کی روشنی سے دنیا کو روشن کرنے کا کام کر رہے ہیں۔

شب برات کے موقع پر طلبا کو بخاری شریف کا آخری درس دیا گیا۔
اس موقع پر مولانا احمد نے کہا کہ قرآن پاک کے بعد سب سے بڑی کتاب بخاری شریف ہے۔
شب برات کی فضیلت پر روشنی ڈالتے ہوئے انہوں نے اس مبارک رات کو گناہوں سے نجات دلانے والی رات بتایا۔

مولانا نے ملک کے موجودہ حالات پر فکر ظاہر کرتے ہوئے کہا کہ آج وطن عزیز میں مسلمانوں کو مختلف کسوٹیوں سے گزرنا پڑرہا ہے۔ انھوں نے کہا کہ ملک کو آزاد کرانے میں مسلمانوں نے عظیم قربانیاں دی ہیں۔ مگر افسوس کی بات یہ ہے کی ملک میں حکومت بدلنے کے بعد مسلمانوں کو اپنی وطن پرستی کا ثبوت دینا پڑ رہا ہے۔ انہوں نے کہا کہ آج مسلمان مخالف تمام طاقتیں اسلام کو بدنام کرنے کی ناپاک کوششیں کر رہی ہیں، ایسے نازک وقت میں ہمیں ان طاقتوں سے دین کے راستے پر چل کر مقابلہ کرنا چاہیے۔مولانا کہا کہ سب کا ساتھ اور سب کا وکاس کے نام پر لوگوں کو گمراہ کرنے والی طاقتیں مسلمانوں کی مخالفت میں اس قدر مصروف ہو گئی ہیں کہ تمام اچھائی اور برائی کو طاق پر رکھ دیا ہے۔ برما میں مسلمانوں پر ہورہے ظلم اور قتل عام پر افسوس جتاتے ہوئے تمام مسلم ممالک سے متحد ہونے پربھی انہوں نے زور دیا ۔اس موقع پر دارالعلوم وقف کے استاد مولانا نسیم اختر شاہ قیصر نے طلبا سے اسلام کی صحیح تصویر دنیا کے سامنے پیش کرنے کی گزارش کی۔ اخیر میں مولانا احمد خضر شاہ مسعودی نے ملک اور پوری دنیا میں امن و امان اور دنیا بھر میں رہ رہے مسلمانوں کی ترقی کے لئے دعا کی۔