ریاست مغربی بنگال میں اسمبلی انتخابات میں چند ماہ باقی رہ گئے ہیں۔ حکمراں جماعت ترنمول کانگریس اور بی جے پی کے درمیان مقابلہ ہونے کا امکان ظاہر کیا جارہا ہے۔
وہیں دوسری جانب بایاں محاذ اور کانگریس اتحاد بھی اس بار پر امید ہے کہ انتخابات میں ان کو بڑی کامیابی ملے گی۔
ریاست میں گذشتہ کئی برسوں سے اپنی طاقت میں اصافہ کرنے والی بی جے پی بھی پورے قوت کے ساتھ بنگال کا اقتدار پر قابض ہونے کے لئے سرگرم نظر آرہی ہے، یہی وجہ ہے کہ بی جے پی کے کئی مرکزی رہنما لگاتار بنگال کے دورے کر رہے ہیں۔ اور بنگال کے عوام سے ملاقات کررہے ہیں۔
وہیں کولکاتہ کے دورے پر آئے بی جے پی کے مرکزی رہنما جگدمبیکا پال نے ای ٹی وی بھارت کے ساتھ ایک خصوصی گفتگو میں کہا کہ بنگال کی وزیر اعلی ممتا بنرجی نے بنگال کے لوگوں کو مرکزی حکومت کے مختلف اسکیما سے دور رکھا ہے، یہاں کے غریبوں کے لئے مرکزی حکومت نے کئی اسکیمز جاری کئے ہیں۔
انہوں نے کہا کہ بنگال کی وزیر اعلی ممتا بنرجی نے وزیر اعظم نریندر مودی کے اسکیمز کو نافذ نہیں کیا ہے وہ چاہے جن دھن یا آیوشمان ہو یا کسان یوجنا ہو ان تمام اسکیمز سے بنگال کے لوگ محروم ہیں۔
ممتا بنرجی صرف خوشامد کی سیاست کرتی ہیں۔ اب ان کو بھی بات سمجھ میں آگئی ہے۔ بنگال کے لوگ ان سے پریشان ہیں۔ اب بنگال میں اسمبلی انتخابات ہونے والے ہیں اور بنگال کے لوگ سمجھ چکے ہیں کہ ان کو کیا کرنا ہے۔ اس بار بنگال میں بی جے پی کا کمل کھلنا طے ہے۔
