فلسطین کے مختلف شہروں بالخصوص غزہ پٹی پر صیہونی ریاست کی جارحیت کے بعد سعودی عرب نے اس زیادتی کی شدید الفاظ میں مذمت کی ہے۔
اطلاع کے مطابق سعودی سفیر ڈاکٹر عبدالعزیز نے اپنے بیان میں کہا ہے کہ اسرائیلی فوج کے حملوں میں سینکڑوں فلسطینی مارے جاچکے ہیں۔
انہوں نے اقوام متحدہ کی انسانی حقوق کونسل سے خطاب کرتے ہوئے کہا کہ اسرائیلی فوج غزہ میں طاقت کا بے دریغ استعمال کررہی ہے۔
سعودی سفیر نے عالمی برادری سے مطالبہ کیا کہ وہ مقبوضہ فلسطینی علاقوں میں اسرائیل کی ان جارحانہ کارروائیوں کو رکوائیں اور ان جرائم کے ذمہ داروں کا احتساب کریں۔
یاد رہے کہ غزہ میں قابض اسرائیلی فوجیوں نے اپنی جارحیت جاری رکھی ہے، ہفتہ وار مظاہرے کے دوران ہمیشہ کسی نہ کسی نہتے شہری کو ہلاک کردیا جاتا ہے۔
گذشتہ روز غزہ میں ہفتہ وار احتجاجی مظاہرے کے دوران اسرائیل میں قابض فوج کی فائرنگ سے ایک فلسطینی ہلاک جبکہ درجنوں زخمی ہوگئے تھے۔
خیال رہے کہ اسرائیل میں الیکشن نو اپریل کو ہونے جارہے ہیں، بین الاقوامی تعلقات عامہ کے ماہرین نے بتایا ہے کہ اسرائیلی وزیراعظم نتن یاہو شدید تناؤ کا شکار ہیں۔
