ٹی ایم آر ای آئی ایس ( تلنگانہ مائناریٹی ریسیڈینشل اسکول ) کے صدر اور حکومت تلنگانہ کے مشیر برائے اقلیتی امور عبدالقیوم خان نے جمعرات کو ٹی ایم آر ای آئی ایس کے امتحانی مراکز کا دورہ کیا جہاں انہوں نے طلبہ سے ملاقات کی اور ان کو تعلیمی میدان میں آگے بڑھنے کا مشورہ دیا۔
عبد القیوم خان نے سعیدآباد میں دو مراکز کا دورہ کیا اور آصف نگر بوائز-1 اور بہادر پورہ گرلز-1 کی طالبات سے بات چیت کی۔
اس موقع پر انہوں نے کہا کہ ٹی ایم آر ای آئی ایس طلباء کی پیشہ ورانہ ترقی کے لیے پرعزم ہے اور باقاعدہ ماہرین تعلیم کے علاوہ ایل اے ڈبلیو سی ای ٹی، سی اے، آئی آئی ٹی، ای اے ایم سی ای ٹی، ای پی ٹی اور این ای ای ٹی جیسے کورسز کے لیے کوچنگ فراہم کرتا ہے۔
مزید پڑھیں:۔ دہلی: 'بچوں کو معیاری تعلیم دلانا حب الوطنی کی علامت ہے'
ٹی ایم آر ای آئی ایس کے سیکرٹری بی شفیع اللہ نے کہا کہ مائناریٹی ریسیڈنشیل جونیئر کالج کے 4,383 طلباء امتحانات میں شرکت کررہے ہیں۔ ہاسٹل میں رہنے والے تمام طلباء کو ہینڈ سینیٹائزر اور فیس ماسک فراہم کیا جاتا ہے۔ طلباء کو متوازن اور غذائیت سے بھرپور خوراک دی جاتی ہے، جس میں ابلا ہوا انڈا، ادرک، دودھ اور پھل وغیرہ شامل ہیں۔
انہوں نے کہا کہ تمام اسکولز اور جونیئر کالجز میں صابن، فیومیگیشن مواد اور دیگر ضروری ادویات بھی فراہم کی جارہی ہیں۔ ہاسٹلز بالخصوص ڈائننگ ہالز میں جسمانی دوری کے اصولوں پر سختی سے عمل کیا جارہا ہے۔ طلباء کی صحت کی صورتحال پر 24 گھنٹے نظر رکھی جارہی ہے۔
