نئی دہلی: سپریم کورٹ نے جمعرات کو کہا کہ بی جے پی کی قیادت والی کرناٹک حکومت کا مسلمانوں کے لیے چار فیصد کوٹہ ختم کرنے کا فیصلہ بالکل غلط ہے۔ عدالت نے ریاستی حکومت کے ووکلیگاس اور لنگایت کے لیے 2 فیصد کوٹہ بڑھانے کے فیصلے کو بھی ناقابل قبول اور ناقص قرار دیا۔ عدالت عظمیٰ نے کیس کی سماعت 18 اپریل تک ملتوی کردی۔
اس سے پہلے دن میں چیف جسٹس ڈی وائی چندر چوڑ اور جسٹس پی ایس نرسمہا اور جے بی پارڈی والا پر مشتمل بنچ نے سینیئر وکیل کپل سبل کے دلائل کی سماعت کی۔ کپل سبل نے اس بات پر روشنی ڈالی تھی کہ یہ عرضی چار فیصد ریزرویشن کی منسوخی کے خلاف ہے۔
تیس مارچ کو وزیر اعلی بسواراج بومائی کی قیادت والی حکومت نے مسلمانوں کے لیے 4 فیصد پسماندہ طبقے کے کوٹہ کو ختم کرنے کے کابینہ کے فیصلے کو مطلع کیا۔ انہیں کرناٹک میں 100 سال سے زیادہ عرصے سے ایک پسماندہ طبقے کے طور پر تسلیم کیا گیا ہے اور ریاست کی دو سب سے زیادہ اثر دار برادریوں لنگایت اور ووکلیگاس کو مسلم او بی سی کوٹہ مختص کیا گیا ہے۔
اس کے علاوہ 24 مارچ کو کابینہ نے درج فہرست ذاتوں کے لیے کوٹہ کے اندر ایک کوٹہ طے کرنے کا فیصلہ کیا، جسے 2012 سے ہی بی جے پی، کانگریس اور جے ڈی ایس حکومتوں نے توجہ نہیں دی ہے۔ یہ فیصلے الیکشن کمیشن کی طرف سے ریاست میں اسمبلی انتخابات کے شیڈول کے اعلان سے چند دن پہلے آئے ہیں۔ کرناٹک میں 10 مئی کو ووٹنگ ہوگی اور ووٹنگ کے نتائج کا اعلان 13 مئی کو کیا جائے گا۔
یہ بھی پڑھیں: Muslim Reservation Issue مسلم ریزرویشن کے لیے آئین میں کوئی شق نہیں ہے، امت شاہ
