بہار کے وزیراعلیٰ نتیش کمار نے کورونا کی ممکنہ تیسری لہر سے ریاست کے باشندوں کو محتاط رہنے کی صلاح دیتے ہوئے ٹیکہ کاری کو کورونا سے آزادی کا کارگر حل بتایا اور کہاکہ ٹیکہ کاری کے لئے لوگوں میں بیداری مہم چلائی جارہی ہے۔
وزیر اعلیٰ نتیش کمار نے جمعہ کو دار الحکومت پٹنہ کے کنکڑباغ واقع پاٹلی پتر اسپورٹس کمپلیکس میں ٹیکہ کاری مہم 2.0 کی شروعات کرتے ہوئے کہاکہ وزیر اعظم نریندر مودی کی یوم پیدائش کے موقع پر آج ٹیکہ کاری کی خصوصی مہم چلائی گئی ہے۔ آج 30 لاکھ سے زائد افراد کی ٹیکہ کاری کا ہدف رکھا گیاہے۔
وزیراعظم کی یوم پیدائش کے موقع پر اس اچھے کام کے ذریعہ لوگ انہیں خصوصی عزت دے رہے ہیں۔ وزیراعلیٰ نے کہاکہ کورونا ٹیکہ کاری کی شروعات ملک بھر میں 16 جنوری 2021 کوکی گئی۔ پہلے مرحلہ میں طبی اہلکار اور فرنٹ لائن ورکر کی ٹیکہ کاری کا آغاز کیا گیا۔
مزید پڑھیں: وزیراعظم کی یوم پیدائش پر شاہنواز حسین نے چادر پوشی کی
یکم مارچ سے دوسرے مرحلہ میں 60 سال یا اس سے زائد کے لوگوں اور 45 سال سے اوپر کے سنگین بیماری میں مبتلا لوگوں کی اور یکم اپریل سے سبھی 45 سال سے اوپر کے لوگوں کی ٹیکہ کاری شروع کی گئی۔ 09 مئی سے سبھی 18 سال سے اوپر کے لوگوں کوٹیکہ کاری مہم میں شامل کیا گیا۔
یو این آئی
