رامپور میں تاجروں اور پولیس اہلکار کے درمیان چل رہا تنازع آخر کار آج ختم ہو گیا۔ رامپور کے تھانہ کوتوالی میں ایک میٹنگ کا انعقاد کر کے سی او سٹی شری کانت پرجاپتی نے قصوروار پولیس اہلکار کے ذریعہ تاجر رہنما شیلیندر شرما سے معافی منگوا کر خوشگوار ماحول میں دونوں کے درمیان سمجھوتہ کرایا۔
وہیں اترپردیش ادھیوگ ویاپار منڈل کے ضلع صدر شیلیندر شرما نے میٹنگ کے بعد اطمینان کا اظہار کرتے ہوئے کہا کہ وہ اب اپنی احتجاجی مہم کو واپس لے رہے ہیں۔
واضح رہے کہ گذشتہ دنوں وزیر اعلی یوگی کی رامپور آمد کے موقع پر اترپردیش ویاپار منڈل کے ضلع صدر شیلیندر شرما کے ساتھ پولیس چوکی کنڈا انچارج کی مبینہ زیادتی اور دہشت گرد کہے جانے کے خلاف تاجر برادری گذشتہ کئی روز سے احتجاجی مہم جاری رکھے ہوئے تھی۔ یہاں تک کہ تاجروں نے احتجاجاً اپنی دکانوں پر 'میں بھی آتنکی ہوں' کے پوسٹر چسپاں کر دیے تھے۔
تاجروں کا مطالبہ تھا کہ قصوروار پولیس اہلکار کے خلاف قانونی کارروائی کی جائے۔ جبکہ ضلع انتظامیہ کی طرف سے گفت و شنید کے ذریعہ حل تلاش کرنے کی بات تواتر کے ساتھ کہی جا رہی تھی، لیکن تاجر برادری قانونی کارروائی پر بضد تھی۔
یہ بھی پڑھیں:
رامپور میں تاجر کیوں ہو رہے ہیں پولیس استحصال کا شکار؟
یہی وجہ ہے کہ پولیس افسران نے معاملہ کو طول پکڑتا دیکھ کر دونوں کے درمیان مفاہمت کی کوششوں کو جاری رکھتے ہوئے آج سمجھوتہ کرایا۔
