گزشتہ نو ماہ سے کسان تحریک سے وابستہ سماجی کارکن نیشنل شوٹر پونم پنڈت نے آج لکھنؤ پہنچ کر کانگریس پارٹی دفتر پر کانگریس پارٹی میں شمولیت اختیار کرلی ہے۔ انہوں نے کہا ہے کہ پرینکا گاندھی جس طریقے سے بیٹیوں کے حقوق کی لڑائی لڑرہی ہیں۔ مجھے محسوس ہوا کہ ان کے ساتھ ہونا چاہیے تاکہ اس لڑائی کو اور مضبوط بنایا جاسکے۔
انہوں نے مزید کہا کہ یہ لڑائی کانگریس، بی جے پی یا سماجوادی پارٹی کی نہیں ہے بلکہ یہ لڑائی بیٹی بنام بی جے پی کی ہے۔
انہوں نے مزید کہا کہ موجودہ وقت میں سب سے اہم اور ضروری ہے کہ بیٹیوں کے مسائل اور ان کے حقوق کا تحفظ کیا جائے۔ اس کام میں کانگریس پارٹی پیش پیش نظر آرہی ہے، اس لئے اس کی نظریاتی و فکری ہم آہنگی سے متاثر ہوکر پارٹی میں شمولیت اختیار کیا ہے۔
یہ بھی پڑھیں:اترپردیش: کانگریس کا لڑکیوں کو اسمارٹ فون اورالیکٹرک اسکوٹی دینے کا اعلان
ایک سوال کے جواب میں پونم نے کہا کہ آنے والے انتخابات میں حصہ نہیں لینا ہے۔ تاہم ریاست کے متعدد علاقوں میں کانگریس پارٹی کی اشتہاری مہم کو دھار دار بنائیں گے۔
اس موقع پر کانگریس کے ریاستی صدر اجے کمار للو نے کہا کہ پارٹی کی جنرل سکریٹری پرینکا گاندھی نے بیٹیوں کے حقوق کے تحفظ اور ان کو آگے بڑھانے کے لئے ایک وعدہ کیا ہے کہ اگر اتر پردیش میں کانگریس پارٹی اقتدار میں آئی تو ریاست کی بارہویں درجہ کی سبھی لڑکیوں کو اسمارٹ فون اور گریجویشن کرنے والی لڑکیوں کو الیکٹرک اسکوٹی دیا جائے گا۔
