پولیس نے شمالی کشمیر کے ضلع بانڈی پورہ میں ایک خاتون عسکریت پسند اعانت کار کو گرفتار کرنے کا دعویٰ کیا ہے۔
سرکاری ذرائع نے بتایا کہ عسکری اعانت کار کی نقل وحمل کے بارے میں ایک اطلاع موصول ہونے پر پولیس کی ایک ٹیم نے آلوسہ بانڈی پورہ میں ناکہ لگا دیا۔
انہوں نے بتایا کہ ناکہ پر چیکنگ کے دوران شیری بارہمولہ سے تعلق رکھنے والی ایک خاتون کو گرفتار کیا گیا جس کی تحویل سے ایک ہینڈ گرینیڈ اور کچھ قابل اعتراض مواد بر آمد کیا گیا۔
مذکورہ ذرائع نے بتایا کہ گرفتار شدہ خاتون نے تفتیش کے دوران اعتراف کیا کہ وہ عسکریت پسندوں کے لئے کام کرتی تھی۔
انہوں نے کہا کہ پولیس نے اس ضمن میں ایک کیس درج کرکے مزید تحقیقات شروع کی ہیں۔
یو این آئی
