یادگیر: خستہ حال سڑکوں سے مسافر اور عوام پریشان

اسٹیشن جانے والی سڑک، بائی پاس چیتاپور سڑک، گنج ایئریا، مسلم پورہ سمیت دیگر علاقوں میں کئی سڑکیں خستہ حالی کا شکار ہوگئی ہیں۔ جس کی وجہ سے عوام کو سخت دقتوں کا سامنا کرنا پڑ رہا ہے۔

ریاست کرناٹک کے ضلع یادگیر کی کئی اہم شاہراہیں بارش کے سبب خستہ حالی کا شکار ہو چکی ہیں اور کئی جگہوں پر حالیہ دنوں میں بنائی گئی سڑکوں کا معیار بھی ابتر ہوگیا ہے۔ جس کے باعث راہگیروں کو سخت مشکلات کا سامنا کرنا پڑ رہا ہے۔

اسٹیشن جانے والی سڑک، بائی پاس چیتاپور سڑک، گنج ایئریا، مسلم پورہ سمیت دیگر علاقوں میں کئی سڑکیں خستہ حالی کا شکار ہوگئی ہیں۔

31 بلدیہ حلقے والے اس شہر کی اندرونی سڑکوں کا کیا حال ہوگا؟ جب کہ شہر کی اہم اور مصروف سڑکوں میں پڑے ان گہرے گڑھوں سے ہی اندازہ لگایا جا سکتا ہے۔

ان خستہ حال سڑکوں سے آٹو اور موٹرسائیکل سواروں کا گزرنا محال ہو گیا ہے۔

مقامی لوگوں کا کہنا ہے کہ ضلع انتظامیہ کو چاہیے کہ شہر کی اہم سڑکوں کی ناقص تعمیراتی کاموں سے متعلق جانکاری حاصل کرے اور متعلقہ ذمہ داران کو جلد از جلد شہر کی ان اہم مصروف ترین سڑکوں کو درست کرنے کے احکامات جاری کرے۔