نئی دہلی: کانگریس اور اپوزیشن جماعتوں کے لیڈروں نے جمعرات کو پارلیمنٹ ہاؤس میں راجیہ سبھا میں حزب اختلاف کے لیڈر ملکارجن کھڑگے کے چیمبر میں میٹنگ کی جس میں پارلیمنٹ کی کارروائی کے دوران اپوزیشن کے رول کی حکمت عملی پر تبادلہ خیال کیا گیا۔ کانگریس ذرائع نے بتایا کہ کانگریس کے علاوہ ڈی ایم کے، ترنمول کانگریس، سماج وادی پارٹی، جنتا دل یونائیٹڈ، شیو سینا، مارکسسٹ کمیونسٹ پارٹی، کمیونسٹ پارٹی آف انڈیا، نیشنلسٹ کانگریس پارٹی، نیشنل کانفرنس کے ساتھ ساتھ آئی یو ایم ایل، کیرالہ کانگریس اور عام آدمی پارٹی کے لیڈروں نے میٹنگ شرکت کی۔ اپوزیشن جماعتوں کے لیڈروں کا کہنا تھا کہ پارلیمنٹ میں ایل آئی سی ، سرکاری بینکوں اور دیگر سرکاری اداروں میں لگے عام آدمی کے پیسے کے ڈوبنے کے تعلق سے بحث کرانے کی مانگ کی گئی۔
کانگریس کے صدر ملکارجن کھرگے کی قیادت میں حزب اختلاف کے ارکان پارلیمنٹ نے جمعرات کو اڈانی معاملے کی مشترکہ پارلیمانی کمیٹی کے ذریعے یا سپریم کورٹ کی نگرانی میں جانچ کرانے کا مطالبہ کیا۔ کانگریس صدر نے وجئے چوک میں پارلیمنٹ کے باہر ایک پریس بریفنگ سے خطاب کرتے ہوئے کہا کہ ہم اڈانی معاملے پر چیف جسٹس آف انڈیا کی سربراہی میں مشترکہ پارلیمانی کمیٹی یا سپریم کورٹ کی نگرانی میں ہونے والی تحقیقات کی روزانہ رپورٹنگ کا مطالبہ کرتے ہیں۔ دونوں ایوانوں میں ایک ہی معاملے پر ہنگامہ آرائی۔ 'جب ہم اہم مسئلے اٹھاتے ہیں تو ان پر بحث کے لیے وقت نہیں دیا جاتا۔ ہمارے نوٹس مسترد ہو جاتے ہیں۔ غریب لوگوں کا پیسہ LIC، SBI اور دیگر قومی بینکوں میں ہے اور اسے منتخب کمپنیوں کو دیا جا رہا ہے۔ ہمیں بحث کرنے کی ضرورت ہے۔ کھڑگے نے یہ بھی کہا کہ انہوں نے لوک سبھا میں پارلیمنٹ کے قاعدہ 267 کے تحت التوا کا نوٹس پیش کیا، جس میں انہی مسائل پر بحث اور سرمایہ کاری کرنے والی کمپنیوں کی مارکیٹ ویلیو کے نقصان کا مطالبہ کیا گیا، جس سے 'کروڑوں ہندوستانیوں کی محنت سے کمائی گئی بچت کو خطرہ لاحق ہے۔'
راجیہ سبھا میں چیرمین جگدیپ دھنکھر نے کہا کہ موصول ہونے والے نوٹسز میں سے کوئی بھی قاعدہ 267 کے تحت تقاضوں کو پورا نہیں کرتا، اور اس لیے، ان کو مسترد کر دیا جاتا ہے"۔ ان کے فیصلے پر ارکان کی جانب سے شور شرابہ کیا گیا جس کے بعد انہوں نے ایوان کی کارروائی دوپہر دو بجے تک ملتوی کر دی۔ اس دوران لوک سبھا میں ارکان نے نعرے بازی کرتے ہوئے وقفہ سوالات میں خلل ڈالا جس کی وجہ سے ایوان زیریں کی کارروائی بھی ملتوی کردی گئی۔ دونوں ایوانوں کی کارروائی دوپہر دو بجے تک ملتوی کر دی گئی۔
یو این آئی
