بہار کے گیا ضلع کے ڈوبھی پولیس اسٹیشن حدود میں چوروں کی دہشت سے پریشان گاؤں کے لوگوں نے ایک شخص کو چور سمجھ کر پیٹ پیٹ کر ہلاک کردیا، جس سے علاقے میں سراسیمگی ہے۔
معلومات کے مطابق یہ واقعہ بدھ کی صبح تین بجے کیشاپی گاؤں میں پیش آیا۔ مقتول کی شناخت گروا تھانہ علاقہ کے جگناتھ پور گائوں کے مہندر پاسوان کا 19 سالہ بیٹا دیپ کمار کے نام سے ہوئی ہے۔
اس دردناک واقعے کا ویڈیو سوشل میڈیا پر تیزی سے وائرل ہورہا ہے۔ بتایا جارہا ہے کہ یہ ویڈیو نو فروری کی رات کو سوشل میڈیا پر اپلوڈ کیا گیا ہے، جہاں ایک نوجوان کو چور ہونے کی شک میں پکڑا گیا اور اسے ایک درخت سے باندھ کر لاٹھیوں سے اسے زدوکوب کیا گیا۔ ویڈیو میں نوجوانوں نے چھوڑنے کی فریاد کی مگر لوگوں کو ترس نہیں آیا اور نوجوان کی اتنی بے رحمی سے پٹائی کی گئی جس سے وہ فوت ہو گیا۔
یہ واقعہ ڈوبی تھانہ علاقہ کے گاؤں کیشاپی کا ہے۔ اطلاعات کے مطابق لوگوں نے اس نوجوان کے ساتھ چور ہونے کی شک میں مار پیٹ کی، جس کی وجہ سے وہ شدید زخمی ہوگیا۔ حالت نازک ہونے کی وجہ سے تھانہ ڈوبھی کو اطلاع دی گئی۔ اطلاع پر پولیس موقع پرپہنچ گئی اور اسے مقامی ہیلتھ مرکز لایا، لیکن صورتحال کی شدت کو دیکھ کر ڈاکٹر نے اسے ریفر کردیا۔ علاج کے لیے اسے لے جایا جا رہا تھا اسی دوران اس کی موت ہو گئی، حالانکہ پولیس نے اس معاملے میں تین افراد کو گرفتار کیا ہے اور پورے معاملے کی تحقیقات کر رہی ہے۔
