ریاست مغربی بنگال میں کورونا وائرس کے بعد حالات معمول پر آنے کے بعد کھیل کود کی سرگرمیوں میں آہستہ آہستہ تیزی سے اضافہ ہورہا ہے۔ عام لوگ بھی اسٹیڈیمز کی طرف رخ کرنے میں دلچسپی لے رہے ہیں۔ تاریخی کلب محمڈن اسپورٹنگ کے جنرل سیکریٹری دانش نے کہا کہ اپنے ہوم گراؤنڈ کو عالمی سطح کے اسٹیڈیم میں بدلنا ہماری ترجیحات میں شامل ہے اور اس پر کام شروع ہوچکا ہے۔
بھارتی فٹبال کی تاریخ میں اہم اور منفرد مقام رکھنے والا کلب محمڈن اسپورٹنگ کو اس کا کھویا ہوا مقام دوبارہ واپس دلانے کی کوشش تیز ہوگئی ہے۔
ای ٹی وی بھارت سے خصوصی گفتگو کرتے ہوئے کلب کے جنرل سیکریٹری نے کہا کہ کینٹین کا تعمیراتی کام جاری ہے۔ ایسٹ بنگال اور موہن بگان کی طرح محمڈن اسپورٹنگ کا بھی اپنا کینٹین چند ہفتوں میں بن کر تیار ہوجائے گا۔
انہوں نے کہا کہ کینٹین بننے کے بعد گراؤنڈ کی جدیدکاری کے کاموں میں ہاتھ لگایا جائے گا۔ گراؤنڈ کے تمام اسٹینڈ میں باکٹ سیٹ لگانے کا منصوبہ ہے۔ کلب انتظامیہ کی جانب سے اس کے لئے مغربی بنگال حکومت کو خط لکھا گیا ہے اور امید کرتے ہیں کہ گراؤنڈ کی جدیدکاری بھی جلد شروع ہوجائے گی۔
محمڈن اسپورٹنگ کے جنرل سیکریٹری کا کہنا ہے کہ اگلے سیزن سے ٹیم کے تمام میچز ہوم گراؤنڈ میں کھیلے جائیں گے۔ شائقین کو اپنے خوبصورت ہوم گراؤنڈ میں بیٹھ کر کھیل دیکھنے کا جلد موقع ملے گا۔
انہوں نے کہا کہ جہاں تک چمپیئن شپ میں مظاہرے کا سوال ہے تو ٹیم کی موجودہ کارکردگی سے مطمئن ہوں۔ امید کرتے ہیں کہ ان کی ٹیم خطابی دوڑ میں سب سے آگے رہے گی۔ چالیس برسوں بعد کلکتہ فٹبال لیگ 2021 کی ٹرافی سیاہ سفید جرسی والی ٹیم کی جھولی میں آئے گی۔
