عظیم دینی درس گاہ دارالعلوم دیوبند کے نائب مہتمم اور ممتاز استاذِ حدیث مولانا عبدالخالق سنبھلی کا جمعہ کے روز طویل علالت کے باعث انتقال ہوگیا ہے۔ انا للہ و انا الیہ راجعون۔ ان کے انتقال کی خبر سے دارالعلوم دیوبند سمیت علمی، دینی، اصلاحی اور سماجی حلقوں میں غم کی لہر دوڑ گئی۔ مولانا تقریباً 72 برس کے تھے اور گزشتہ کافی دنوں سے علیل تھے۔
یہ بھی پڑھیں:دہلی کا واحد مسلم مسافر خانہ تنازعات کا شکار
دہلی، مراد آباد، دیوبند اور مظفرنگر میں ماہر ڈاکٹروں کی زیر نگرانی مولانا مرحوم کا علاج جارہ تھا لیکن قابل ذکر افاقہ نہیں ہوا۔ جمعہ کے روز دوپہر قریب ساڑھے تین بجے مظفرنگر اسپتال میں حضرت مرحوم نے آخری سانس لی۔
ان کے انتقال کی خبر سے احاطہ دارالعلوم دیوبند میں واقع ان کی رہائش گاہ پر دارالعلوم دیوبند کے مہتمم مفتی ابوالقاسم نعمانی اور دیگر نامور علماء کرام و اساتذہ نے پہنچ کر تعزیت پیش کرتے ہوئے مرحوم کے انتقال کو عظیم علمی اور ملی خسارہ قرار دیا اور دارالعلوم دیوبند کے لئے انجام دی جانے والی ان کی بے مثال اور مخلصانہ خدمات کو یاد کیا۔
