Leak of Secret Report مودی کے کیرالہ دورے کی خفیہ رپورٹ کا افشا ہونا سنگین معاملہ، مرلی دھرن

وی مرلی دھرن نے کہا کہ یہ شرمناک ہے کہ پولیس انتظامیہ میں ایسے لوگ ہیں جو ملک کے وزیر اعظم کی سکیورٹی کو بھی خفیہ نہیں رکھ سکتے۔ رپورٹ، جسے انتہائی خفیہ رکھا جانا چاہیے، واٹس ایپ گروپس پر گردش کر رہی ہے۔ اس سے ظاہر ہوتا ہے کہ محکمہ داخلہ زوال کی حالت میں ہے۔

کولم: مرکزی وزیر مملکت برائے امور خارجہ وی مرلی دھرن نے ہفتہ کو یہاں کہا کہ وزیر اعظم نریندر مودی کے دورہ کیرالہ سے متعلق انٹیلی جنس رپورٹ کا افشاء سیکورٹی کی سنگین کوتاہی ہے۔ وی مرلی دھرن نے کہا کہ ایڈیشنل ڈائرکٹر جنرل آف پولیس (اے ڈی جی پی) کی خفیہ رپورٹ کا میڈیا کو لیک ہونا ایک سنگین ناکامی ہے۔ انہوں نے یہ باتیں مختلف ملک دشمن تنظیموں کی جانب سے وزیر اعظم کو سیکورٹی کو درپیش خطرات کے حوالے سے رپورٹس لیک ہونے پر صحافیوں کو جواب دیتے ہوئے کہیں۔

اس واقعہ کی تفصیلی تحقیقات کا مطالبہ کرتے ہوئے، انہوں نے کیرالہ کے وزیر اعلیٰ پنارائی وجین پر زور دیا کہ وہ اس معاملے میں بیان دیں اور انٹیلی جنس کی ناکامی کے ذمہ دار اہلکاروں کے خلاف کارروائی کریں۔انہوں نے کہا کہ 'یہ شرمناک ہے کہ پولیس انتظامیہ میں ایسے لوگ ہیں جو ملک کے وزیر اعظم کی سیکورٹی کو بھی خفیہ نہیں رکھ سکتے۔ رپورٹ، جسے انتہائی خفیہ رکھا جانا چاہیے، واٹس ایپ گروپس پر گردش کر رہی ہے۔ اس سے ظاہر ہوتا ہے کہ محکمہ داخلہ زوال کی حالت میں ہے۔ کوزی کوڈ ٹرین میں آگ لگنے کے حالیہ واقعہ کو یاد کرتے ہوئے انہوں نے کہا کہ ریاستی پولیس وزیر اعظم کے ریاست کے دورے کے سلسلے میں اس طرح کی حفاظتی خامیوں پر غور کرنے میں مکمل طور پر ناکام رہی ہے۔

یو این آئی