ریاست بہار کے ضلع گیا میں ' تعلیم تربیت اور انسانیت' کے عنوان پر جلسہ کا اہتمام کیا گیا، جس میں علی گڑھ مسلم یونیورسیٹی کے پروفیسر توقیر عالم نے کہاکہ تعلیم انسان کی زندگی کی اہم کڑی ہے، اس کے بغیر زندگی نامکمل ہے اور تعلیم حاصل کرنے کے لیے عمر کی کوئی قید نہیں۔Jalsa in Gaya
ضلع گیا میں واقع آمس بلاک کے بیدا گاؤں میں منعقد اس جلسے میں مقرر خصوصی کے طور پر علی گڑھ مسلم یونیورسیٹی کے شعبہ دینیات کے سینیئر پروفیسر توقیر عالم فلاحی تھے۔ انہوں نے جلسہ کو خطاب کرتے ہوئے تعلیم کی اہمیت پر روشنی ڈالی، جلسہ میں شامل لوگوں سے خطاب کرتے ہوئے کہاکہ تعلیم ہم سب کی زندگی کی اہم کڑی ہے، موجودہ دور میں جس کے پاس تعلیم ہے، وہ مستحکم اور کامیاب انسان ہے۔ Education Program in Gaya
انہوں نے یہ بھی کہا کہ جس نے تعلیم حاصل نہیں کی، آج اس کی زندگی اندھیرے میں ہے۔ ہاں البتہ جس نے ہنر سکھا، وہ کامیاب ضرور ہے لیکن اس کے ساتھ دشواریاں یہ ہیں کہ موجودہ حالات سے نمٹنے کی قوت نہیں ہے۔ پروفیسر توقیر نے انسانیت پر زور دیتے ہوئے کہاکہ تعلیم کے ساتھ انسانیت کا علم ہونا بے حد ضروری ہے کیونکہ اصل پڑھا لکھا وہی شخص ہے، جو دوسروں کی مصیبت میں کام آتا ہے اور معاشرے میں پھیلی برائیوں پر وار کرتاہے۔
یہ بھی پڑھیں: جے پور: تعلیم و تربیت پروگرام کا انعقاد
پروگرام کے آرگنائزر و گاندھی آزاد پبلک اسکول کے ڈائریکٹر شوکت علی نے بتایا کہ تعلیم وتربیت اور انسانیت کے عنوان پر پروگرام منعقد کیا گیا، جس میں بڑی تعداد میں آمس کے اطراف کے معززین طلبہ اور ان کے سرپرستوں کے علاوہ بڑی تعداد میں علماء کرام شریک ہوئے۔ پروگرام کا اختتام مولانا حذیفہ کی دعا پر ہوا۔
