جبل پور: ریاست مدھیہ پردیش کے ضلع جبل پور کے گڈھا تھانہ علاقے میں دیر رات اندھمک بائی پاس پر دہلی کے کنجھوالا جیسا حادثہ پیش آیا۔ جہاں ایک تیز رفتار ٹرک نے موٹر سائیکل کو ٹکر مار دی۔ ٹرک کی ٹکر سے موٹر سائیکل ڈرائیور دور جا کر گرا جب کہ موٹر سائیکل پر بیٹھی میڈیکل کی طالبہ ٹرک میں پھنس گئی۔ اس دوران ٹرک ڈرائیور نے بھاگنے کے لیے ٹرک کی رفتار بھی بڑھا دی اور لڑکی ٹرک کے ساتھ تقریباً 500 میٹر تک گھسیٹتی جاتی رہی۔ حادثے میں طالبہ کی موت ہو گئی، جب کہ طالب علم تشویشناک حالت میں ہسپتال میں داخل ہے۔ MP truck dragged medical student for many meters
گڑھا پولس اسٹیشن کے انچارج راکیش تیواری نے بتایا کہ شہدول کے رہنے والی روبی ٹھاکر اور ریوا کے رہنے والے سوربھ اوجھا نیتا جی سبھاش چندر بوس میڈیکل کالج میں ایم بی بی ایس تھرڈ ایئر کے طالب علم تھے۔ سوربھ اور روبی بدھ کی رات تلوارہ کی طرف جارہے تھے۔ طالب علم نے بائیک کو بھیڑا گھاٹ بائی پاس چوراہے سے تلوارہ کی طرف جانے والی سروس لین پر ڈال دیا۔ اس سڑک پر بھوپال سے ناگپور کی طرف ایک ٹرک بھی جا رہا تھا۔ سوربھ اور روبی ابھی چوراہے کے قریب پہنچے ہی تھے کہ تیز رفتار ٹرک نے بائک کو ٹکر مار دی۔ طالبہ موٹر سائیکل سمیت ٹرک میں پھنس گئی اور 500 میٹر تک گھسیٹتی چلی گئی۔ طالبہ کی لاش مکمل طور پر مسخ ہو چکی تھی۔ جسم سے بہت زیادہ خون بہنے سے سر اور پورے جسم پر شدید چوٹیں لگنے سے موقع پر ہی اس کی موت ہوگئی۔ اس کے ساتھ ہی نوجوان کو تشویشناک حالت میں جبل پور کے نیتا جی سبھاش چندر میڈیکل کالج اسپتال میں داخل کرایا گیا ہے۔
مزید پڑھیں:۔ Khanjhawala Accident لڑکی کو کار سے گھسیٹنے کا سی سی ٹی وی فوٹیج منظرعام پر، چھ افراد گرفتار
واقعہ کی اطلاع ملتے ہی میڈیکل کے طلبا کی بڑی تعداد اندھمک بائی پاس پر پہنچ گئی اور ٹرک ڈرائیور کی گرفتاری کا مطالبہ کرنے لگے۔ طلباء کی بڑی تعداد کو دیکھ کر سنجیوانی نگر اور دھنونتری نگر چوکی پولیس بھی موقع پر پہنچ گئی۔ اس کے بعد طالبہ کی لاش کو مردہ خانہ میں رکھ دیا گیا ہے۔ صبح گھر والوں کی موجودگی میں پوسٹ مارٹم کیا جائے گا۔ پولیس واقعہ کے آس پاس اور ٹول پلازہ میں نصب سی سی ٹی وی کی بنیاد پر ملزم ٹرک ڈرائیور کی تلاش کر رہی ہے۔ گڑھا پولیس نے نامعلوم ٹرک ڈرائیور کے خلاف مقدمہ درج کر کے تفتیش شروع کر دی ہے۔
