آندھراپردیش کے وزیر اعلیٰ جگن موہن ریڈی نے کرشنا ضلع کے گولاپوڈی میں منگل کے روز دیشا ایپ ماس ڈاؤن لوڈ پروگرام میں شرکت کی۔
وزیر اعلیٰ جگن نے مشورہ دیا کہ ریاست کی ہر خاتون کو اپنی حفاظت کے لیے اپنے موبائل فون میں دیشا ایپ ڈاؤن لوڈ کرنا چاہئے۔ انہوں نے کہا کہ دیشا ایپ کے ذریعے خواتین کو مکمل سکیورٹی فراہم ہوگی۔ وزیراعلیٰ نے کہا کہ دیشا ایپ ہر لڑکی کے بھائی کی طرح ہے جو اپنی بہن کی حفاظت کرتا ہے۔
انہوں نے مزید کہا کہ وہ دیشا ایکٹ کو منظور کروانے کی کوشش کر رہے ہیں، یہ قانون مرکز کے پاس زیر التوا ہے۔ انہیں یقین ہے کہ جلد ہی دیشا ایکٹ نافذ ہوگا۔ اس موقع پر انھوں نے خواتین پولیس اور رضاکاروں کو گھر گھر جاکر مذکورہ ایپ ڈاؤن لوڈ کروانے کی ہدایت کی۔
چیف منسٹر جگن موہن ریڈی نے کہا کہ دیشا ایپ خطرے میں پڑنے والی خواتین اور نوجوان خواتین کی مدد کے لئے لایا گیا ہے۔ وزیراعلیٰ جگن نے یاد دلایا کہ ایک سال قبل حیدرآباد میں دیشا نامی نوجوان لڑکی کے ساتھ جنسی زیادتی کرکے اسے قتل کیا گیا تھا۔ انہوں نے کہا کہ ایسی حالتوں کو روکنے کے لئے 'ہم نے ریاست میں دیشا ایکٹ، ایپ اور خصوصی اسٹیشن متعارف کروائے ہیں۔' امید ہے کہ ان سے خواتین کو محفوظ رکھنے میں مدد ملے گی۔
