قومی دارالحکومت دہلی میں وزیراعظم نریندر مودی نے جمعرات کے روز سابق عالمی شہرت یافتہ فٹ بال کھلاڑی ارجنٹائنا کے ڈیاگو میراڈونا کے انتقال پر اظہار تعزیت کیا اور کہا کہ ان کی ناگہانی موت سے ہم سب غمگین ہیں۔
واضح رہے کہ شہرہ آفاق فٹ بال کھلاڑی ڈیاگو میراڈونا کا بدھ کے روز 60 برس کی عمر میں دل کا دورہ پڑنے سے انتقال ہوگیا، جبکہ کچھ دن پہلے ہی ان کے دماغ میں خون کے تھکے کی سرجری کرائی گئی تھی۔
میراڈونا کی موت پر اظہار تعزیت کرتے ہوئے مسٹر مودی نے ٹوئٹ کیا کہ 'ڈیاگو میراڈونا فٹ بال کے جادوگر تھے جنہوں نے اس کھیل کو دنیا میں مقبولیت کے عروج پر پہنچایا'۔
وزیراعظم نے اپنے ٹوئٹ میں لکھا کہ 'میراڈونا نے اپنی زندگی میں فٹ بال کے میدانوں میں کھیل کے بہترین لمحات سے ہمیں لطف اندوز ہونے کا موقع فراہم کیا، ہم سب ان کی اس ناگہانی موت سے غمزدہ ہیں، ایشور ان کی آتما کو شانتی دے'۔
واضح رہے کہ فٹبال کی تاریخ کے سب سے عظیم کھلاڑیوں میں سے ایک ارجنٹینا کے ڈیاگو میراڈونا کے انتقال کی خبر ملتے ہی ارجنٹینا کے صدر البرٹو فرنانڈیز نے ملک میں سہ روزہ قومی سوگ کا اعلان کردیا ہے۔
ارجنٹینا کے صدر البرٹو فرنانڈیز نے اپنے ملک کے اس عظیم فٹ بالر کی موت پر سہ روزہ قومی سوگ کا اعلان کیا ہے۔ ڈیاگو میراڈونا کی موت پر کھیل کی دنیا میں صف ماتم بچھ گیا ہے۔
وہیں دوسری جانب فٹ بال کی تاریخ کے سب سے بڑے کھلاڑی ڈیاگو میراڈونا کی موت پر مرکزی وزیر کھیل کرن رجیجو، کانگریس کے سابق صدر اور سینیئر رہنما راہل گاندھی اور بی سی سی آئی کے صدر سوربھ گانگولی سمیت مختلف شعبوں سے تعلق رکھنے والے متعدد افراد نے خراج عقیدت پیش کیا ہے۔
