نئی دہلی: دہلی ہائی کورٹ جمعہ کو جے این یو کے سابق طالب علم شرجیل امام کی طرف سے شمال مشرقی دہلی فسادات 2020 میں مبینہ سازش سے متعلق یو اے پی اے کیس میں ضمانت کی درخواست پر سماعت کرے گا۔ شرجیل امام نے ضمانت کی درخواست کو خارج کرنے کے لئے نچلی عدالت کے حکم کو چیلنج کیا ہے اور جسٹس سدھارتھ مردول اور رجنیش بھٹناگر کی بنچ کے سامنے سماعت کے لیے اپنی درخواست درج کی ہے۔ HC to hear on Friday bail plea by Sharjeel Imam in UAPA case
ان پر الزام ہے کہ انہوں نے دسمبر 2019 میں جامعہ ملیہ اسلامیہ یونیورسٹی میں شہریت ترمیمی قانون اور نیشنل رجسٹر آف سٹیزنز (این آر سی) پر حکومت کے خلاف اشتعال انگیز تقریر کی تھی۔ امام نے اپنی درخواست میں کہا ہے کہ کسی قابل قبول مواد کی عدم موجودگی میں ٹرائل کورٹ نے انہیں غلط طور پر فسادات پھیلانے کی سازش کا حصہ قرار دیا اور پہلی نظر میں ان کے خلاف سخت غیر قانونی سرگرمیاں (ممنوعہ) ایکٹ یعنی یو اے پی اے کے تحت 'دہشت گردانہ کارروائی' کا کوئی مقدمہ نہیں بنتا ہے۔
انہوں نے درخواست میں کہا کہ وہ پی ایچ ڈی کورس کے آخری سال کے طالب علم ہیں اور ماضی میں ان کا کوئی مجرمانہ ریکارڈ نہیں ہے۔ درخواست میں کہا گیا کہ ٹرائل کورٹ اس بات کا نوٹس لینے میں ناکام رہی کہ پوری تحقیقات میں خامی ہے اور ان کی تقریر اور تشدد کے درمیان کوئی تعلق نہیں ہے۔ درخواست میں دعویٰ کیا گیا ہے کہ امام کو دہلی پولیس نے ان کے خلاف "ٹارگٹڈ آپریشن" کے ایک حصے کے طور پر گرفتار کیا تھا اور شمال مشرقی دہلی میں تشدد کے وقت اور ان کے مبینہ ساتھی سازشیوں کے ساتھ دیگر معاملات میں پہلے ہی حراست میں تھے۔
- مزید پڑھیں:۔ Sharjeel Imam in Sedition Case: سی اے اے کے خلاف شرجیل امام کی تقاریر پر اٹھائیس مارچ سے روزانہ سماعت
11 اپریل کو خصوصی جج امیتابھ راوت نے تعزیرات ہند اور یو اے پی اے کے تحت ملزم شرجیل امام کو راحت دینے سے انکار کر دیا تھا۔ قابل ذکر ہے کہ فروری 2020 میں شمال مشرقی دہلی میں سی اے اے کے حامیوں اور مخالفین کے درمیان جھڑپوں کے بعد فرقہ وارانہ تشدد شروع ہوا تھا۔
