چنئی: سمندری طوفان 'میچونگ' کے اثر کی وجہ سے پیر کو چنئی اور اس کے آس پاس کے اضلاع میں شدید بارش کا سلسلہ جاری ہے۔ اس طوفان کا 5 دسمبر کو آندھرا پردیش کے ساحل تک پہنچنے کا امکان ہے۔ مسلسل موسلادھار بارش کے باعث شہر کے نچلے اور رہائشی علاقے زیرآب ہو گیے ہیں۔ میونسپل کارپوریشن کے ملازمین شہر کے مختلف مقامات پر جمع پانی کو نکالنے کی کوشش کر رہے ہیں۔ تیز ہواؤں کے ساتھ موسلادھار بارش کے باعث شہر کے کئی علاقوں میں بجلی غائب اور انٹرنیٹ سروس درہم برہم ہوگئی ہیں۔
ذرائع کے مطابق مسلسل بارش کی وجہ سے چنئی ہوائی اڈے کی پروازیں صبح 9:40 سے 11:40 تک معطل رہی جس کی وجہ سے ہوائی اڈے سے آنے اور جانے والی تقریباً 70 پروازیں منسوخ کر دی گئیں۔ مزید رن وے اور ٹرمیک بھی بند ہیں۔ غور طلب ہو کہ سمندری طوفان 'میچونگ' کے اثر کی وجہ سے چنئی اور اس کے آس پاس کے چنگل پیٹ، کانچی پورم اور تروولور اضلاع میں اتوار کی دیر رات سے موسلادھار بارش جاری ہے۔
یہ بھی پڑھیں:
- تمل ناڈو: پی ڈبلیو ڈی کے وزیر گھر پر انکم ٹیکس کا چھاپہ
- تمل ناڈو میں بارش سے پیش آئے واقعات میں پانچ افراد ہلاک
ہندوستان کے محکمہ موسمیات (آئی ایم ڈی) کے مطابق، سمندری طوفان کا مرکز خلیج بنگال کے جنوب مغرب میں، پڈوچیری کے تقریباً 210 کلومیٹر مشرق شمال میں ہے۔ اس طوفان کا شمال مغرب کی طرف بہت ہی زیادہ مضبوط ہونے اور 5 دسمبر کی صبح آندھرا پردیش کے نیلور اور مچلی پٹنم کے ساحل سے ٹکرانے کا امکان ہے۔ واضح رہے کہ طوفان کی وجہ سے ریل اور ہوائی خدمات منسوخ ہو گئی ہیں۔
