نئی دہلی: گجرات اور ہماچل پردیش انتخابات کے نتائج کے ساتھ ہی ایک لوک سبھا سیٹ اور چھ اسمبلی سیٹوں کے ضمنی انتخابات کے ووٹوں کی گنتی آج ہوگی۔ آپ کو بتا دیں کہ ان سیٹوں پر 5 دسمبر کو ووٹنگ ہوئی تھی۔ ان کے نتائج کا اعلان آج یعنی 8 دسمبر کو کیا جائے گا۔ اس میں سب کی نظریں یوپی کی دو اسمبلی سیٹوں (رام پور، کھٹولی ) اور مین پوری لوک سبھا سیٹ پر ٹکی ہوئی ہیں۔ بی جے پی اور ایس پی دونوں نے ان سیٹوں پر جیت کو اپنے وقار کی جنگ بنا لیا ہے۔ اس کے علاوہ پانچ ریاستوں کی چھ اسمبلی سیٹوں کے ضمنی انتخابات کے نتائج بھی آج جاری کیے جائیں گے۔ یہ اسمبلی سیٹیں اتر پردیش میں رام پور اور کھٹولی ، اڈیشہ میں پدم پور، راجستھان میں سردارشہر، بہار کی کڈھنی اور چھتیس گڑھ کی بھانوپرتاپ پور ہیں۔By Poll Election Results 2022
اکتوبر میں سماج وادی پارٹی کے بانی ملائم سنگھ یادو کے انتقال کی وجہ سے مین پوری سیٹ پر ضمنی انتخاب ہو رہا ہے۔ رام پور صدر سیٹ ایس پی رہنما اعظم خان کی نااہلی سے خالی ہوئی تھی۔ ملائم سنگھ یادو کی بڑی بہو اور پارٹی صدر اکھلیش یادو کی بیوی ڈمپل یادو مین پوری سے امیدوار ہیں جبکہ ملائم سنگھ کے بھائی شیو پال سنگھ یادو کے سابق معتمد رگھوراج سنگھ شاکیہ اس سیٹ سے بی جے پی کے امیدوار ہیں۔ کھٹولی میں بی جے پی راج کماری سینی کو میدان میں اتار کر اس سیٹ کو برقرار رکھنے کی کوشش کر رہی ہے، وہ وکرم سنگھ سینی کی اہلیہ ہیں، جنہیں 2013 کے فسادات کے ایک مقدمے میں ضلعی عدالت کی طرف سے قصوروار ٹھہرائے جانے اور دو سال قید کی سزا سنائے جانے کے بعد اسمبلی سے نااہل قرار دیا گیا تھا۔ آر ایل ڈی نے یہاں سے مدن بھیا کو اپنا امیدوار بنایا ہے۔
