ریاست مہاراشٹر کے شہر مالیگاؤں میں اردو کتاب میلہ میں زبردست جوش وخروش دیکھا جارہا ہے۔ میلے کے تئیں خواتین میں زیادہ دلچسپی پائی جارہی ہے۔
اردو کتاب میلے کے تیسرے روز صبح 9 بجے سے دیر رات ایک بجے تک ہزاروں محبان اردو، طلباء و طالبات، اساتذہ اور گھریلو خواتین کے علاوہ برادران وطن گروپ در گروپ کی شکل میں پہنچ رہے ہیں جس کی وجہ سے میلہ کا رونق کچھ الگ ہی ہے۔
مالیگاؤں میں منعقدہ اردو کتاب میلے میں دیکھا گیا کہ مسلمانوں کے علاوہ دیگر مذاہب کے لوگ بھی اردو کتابوں کی خریدای میں انتہا درجے کی دلچسپی رکھتے ہیں۔
ای ٹی وی بھارت کے نمائندے ایس این انصاری نے صبح و دوپہر اور رات کے اوقات میں اردو کتاب کا معائنہ کیا جہاں دیر شام تک بھیڑ دیکھنے کو ملی۔
واضح رہے کہ یہ کتاب میلہ مالیگاؤں کے قدوائی روڈ پرلگایا گیا ہے۔
اردو کتاب میلے میں سب سے زیادہ تعداد خواتین اور طالبات کی دیکھی جارہی ہے۔ لوگ مع اہل و عیال اور اسکول کی جانب سے گروپ کی شکل میں میلے میں شرکت کر رہے ہیں۔ ہر فرد اپنی حیثیت، ذوق مطالعہ اور من پسند کتابوں کو خرید بھی رہا ہے۔
اس کتاب میلہ میں کم عمر اور معصوم بچے اور بچیوں کی تعداد بھی دیکھی جاسکتی ہے ۔
اس میلے میں بک اسٹالز پر بچوں کی مزاحیہ کہانیوں، لطائف، کارٹونز، ڈرائنگ بک، مہندی کتاب، کھانا بنانے کی کتاب، انگلش سیکھنے کی کتاب، ناول، جریدے، اور اسلامی کتابوں کے علاوہ معذوروں کے لیے خصوصی کتابیں بھی دستیاب ہیں۔
اس کتب میلے کا انعقاد مالیگاوں بک سیلرز کی جانب سے کیا جارہا ہے۔
اردو کتاب میلے کے ذمہ داران نے بتایا کہ کتابوں کے اسٹال کے علاوہ روزانہ مخلتف قسم کی دینی، تعلیمی اور ثقافتی تقاریب بھی منعقد کی جا رہی ہیں۔ اردو کتاب میلہ آخری روز تک کامیابی کی بلندی کو چھو لے گا اور ایک تاریخ مرتب کرے گا۔
