تلنگانہ خاص طور پر ہاٹ اسپاٹ حیدرآباد میں کورونا وائرس کیسیز کی تعداد میں مسلسل اضافہ ہونے کے ساتھ ہی مختلف تجارتی کمپنیوں اور تاجروں نے ایک سے دو ہفتوں تک کی مدت کے لئے رضاکارانہ طور پر 'سیلف لاک ڈاؤن' کا اعلان کیا ہے۔
- بیگم بازار:
شہر کے ایک اہم تجارتی مرکز بیگم بازار میں تاجروں نے کچھ دن پہلے کاروباری اوقات کم کردیئے تھے۔ اسی کو دیکھتے ہوئے کئی دیگر علاقوں کے کاروباری افراد نے احتیاطی اقدام کے طور پر شٹر بند کرنے کا فیصلہ کیا۔
حیدرآباد میں واقع کچھ تجارتی مراکز یا تو کنٹینمنٹ زون میں آتے ہیں یا سب سے زیادہ متاثرہ علاقوں کے قریب ہیں۔
- جنرل بازار:
سکندرآباد کے جنرل بازار کے ٹیکسٹائل کے تاجروں نے کورونا وائرس کے پھیلاؤ پر قابو پانے میں مدد کے لئے رضاکارانہ طور پر کچھ دن کے لئے کاروبار بند رکھنے کا فیصلہ کیا۔
ان کی انجمن نے کیسیز کی بڑھتی ہوئی تعداد پر تشویش کا اظہار کیا اور کہا کہ 'یہ فیصلہ لوگوں کے مفاد میں لیا گیا ہے'۔
حیدرآباد کیرانا مرچنٹس ایسوسی ایشن اور حیدرآباد اینڈ سکندرآباد سینیٹری ایسوسی ایشن نے اعلان کیا ہے کہ ان کے ممبران اگلے کچھ دن دکانوں کو بند رکھیں گے۔
- لاڈ بازار اور تروپ بازار:
اسی طرح کا فیصلہ ایک اہم تجارتی مرکز تروپ بازار میں تاجروں نے بھی کیا ہے۔
چوڑیاں اور دلہن کے لباس کے لئے مشہور چارمینار کے قریب تاریخی لاڈ بازار کے تاجروں نے بھی دکانیں بند رکھنے کا فیصلہ کیا۔
- پتھر گیٹی:
چارمینار کے قریب بھی پتھر گیٹی میں تاجروں نے جمعرات سے دکانیں بند کردیں۔
تجارتی اداروں نے یہ فیصلہ کووڈ 19 کے پھیلاؤ پر بڑھتی عوامی تشویش کے درمیان کیا ہے۔
محکمہ صحت کے مطابق 'ہر گزرتے دن کے ساتھ پوری ریاست اور خاص کر حیدرآباد میں کورونا کے کیسیز میں مسلسل اضافہ ہی ہورہا ہے'
ریاست میں بدھ کے روز 891 کیسیز درج کیے گئے، جو ایک دن کی سب سے زیادہ چھلانگ ہے۔ ان میں سے 719 مقدمات گریٹر حیدرآباد سے رپورٹ ہوئے۔
بدھ کے روز ریاست میں کیسوں کی مجموعی تعداد 10،444 ہوگئی۔ وہیں گریٹر حیدرآباد میونسپل کارپوریشن (جی ایچ ایم سی) میں 5،883 کیس ہیں۔
صرف پچھلے ہفتے ہی 4000 سے زیادہ کیسز ریکارڈ کیے گئے اور ان میں سے 80 فیصد حیدرآباد اور ملحقہ اضلاع سے تھے۔
- تاجروں کے فیصلے کا خیرمقدم:
ادھر حیدرآباد کے رکن پارلیمنٹ اسدالدین اویسی نے حیدرآباد کے لاڈ بازار اور دیگر علاقوں کے تاجروں کے فیصلے کا خیرمقدم کیا۔
انہوں نے لوگوں سے اپیل کی کہ 'وہ جسمانی فاصلے کو یقینی بنائیں۔ بڑے اجتماعات سے اجتناب کریں، ماسک پہنیں اور جب تک کہ بالکل ضروری نہ ہو گھر سے باہر نہ نکلیں'۔
اویسی نے ٹویٹ کیا ہے کہ 'گھبرائیں نہیں۔ اگر آپ کو کووڈ 19 میں سے کوئی علامات پائے جاتے ہیں تو فوری طور پر طبی مدد طلب کریں'۔
آل انڈیا مجلس اتحاد المسلمین (اے آئی ایم آئی ایم) کے صدر نے سب سے اپیل کی کہ 'وہ اپنے اور اپنے افراد خاندان کا کووڈ 19 کے لئے جلد سے جلد ٹیسٹ کروائیں'۔
