لندن کی ضلع عدالت نے نیرو مودی کی حوالگی سے متعلق معاملے کی سماعت پوری کرنے کے لیے ان کی ریمانڈ سات جنوری تک کے لیے بڑھادی ہے۔
بھارت کی معروف پنجاب نیشنک بینک (پی این بی) میں تقریباً دو ارب ڈالر کی بد عنوانی کرنے کے ملزم اور ہیروں کے تاجر نیرو مودی کو بھارت کے حوالے کرنے کی درخواست کے بعد گزشتہ برس برطانیہ میں انھیں گرفتار کیا گیا تھا جس کے بعد سے 49 سالہ نیور مودی جنوب ۔ مغربی لندن کی وینڈس ورتھ جیل میں بند ہیں۔
نیرو مودی کی بھارت حوالگی کے معاملے میں اگلی سماعت آئندہ برس سات اور آٹھ جنوری کو ہوگی جہاں ڈسٹرکٹ جج دونوں فریق کے آخری دلائل پر اپنی سماعت مکمل کریں گے اور چند ہفتوں بعد اپنا فیصلہ سنائیں گے۔
لندن کی ضلع عدالت نے نومبر میں آخری مکمل سماعت میں سی بی آئی اور ای ڈی کے ذریعہ مہیا کیے گئے چند گواہوں کے بیانات کی قبولیت کے لیے اور اس کے خلاف دلائل پر سماعت کی تھی۔
اس سماعت کے دوران یہ سہولت بھی دی گئی جس میں مفرور کاروباری نیرو مودی کے خلاف دھوکہ دہی اور منی لانڈرنگ کے ابتدائی معاملے کو ثابت کرنے کے لئے شواہد کو وسیع پیمانے پر قبول کیا گیا۔
