جسٹس شرد اروند بوبڈے کو صدر رام ناتھ کووند نے بھارت کا اگلا چیف جسٹس مقرر کیا ہے، جبکہ چیف جسٹس رنجن گوگوئی کے بعد چیف جسٹس کا عہدہ سنبھالنے والے جسٹس بوبڈے 18 نومبر کو حلف لیں گے۔
واضح رہے کہ موجودہ چیف جسٹس آف انڈیا رنجن گوگوئی نے مرکزی حکومت کو خط لکھ کر ایس اے بوبڈے کے نام کی سفارش کی تھی، جس پو اب مرکزی حکومت نے بھی مہر ثبت کردی ہے۔
یاد رہے موجودہ چیف جسٹس آف انڈیا رنجن گوگوئی آئندہ ماہ 17 نومبر سنہ 2019 کو چیف جسٹس کے عہدے سے سبکدوش ہو رہے ہیں۔
خیال رہے کہ سنہ 1956 میں پیدا ہونے والی ایس اے بوبڈے نے بی اے ایل اے بی کی ڈگری ناگپور سے حاصل کی ہے۔ سنہ 1978 میں وہ بار کونسل کے رکن بنے اور بامبے ہائی کورٹ کی ناگپور بنچ میں پریکٹس کرنے لگے۔
سنہ 2010 میں جسٹس ایس اے بوبڈے کو بامبے ہائی کورٹ کا اضافی جج بنایا گیا۔
سنہ 2012 میں وہ ریاست مدھیہ پردیش کے چیف جسٹس بنے، جبکہ سنہ 2013 میں انھیں سپریم کورٹ کا جج مقرر کیا گیا۔
یاد رہے کہ جسٹس ایس اے بوبڈے 23 اپریل سنہ 2021 تکا س عہدے پر برقرار رہیں گے، جس کے بعد وہ سبکدوش ہوجائیں گے۔
واضح رہے کہ جسٹس شرد اروند بوبڈے وہ جج ہیں جنھوں نے سی جے آئی رنجن گوگوئی کے خلاف جنسی ہراسانی کے الزامات کی تحقیقات کرنے والی کمیٹی کی سربراہی کی تھی، جبک وہ آدھار کیس اور ایودھیا تنازعہ جیسے مقدمات میں کئی بنچوں کا حصہ بھی رہ چکے ہیں۔
