تلنگانہ کے وزیر داخلہ میں کورونا کی تشخیص

ریاست تلنگانہ میں کورونا کیسز میں تیزی سے اضافہ ہو رہا ہے اسی ضمن میں ریاست کے وزیر اعلی کے سی آر نے کہا ہے کہ وہ حیدرآباد میں ایک بار پھر سے لاک ڈاو نافذ کرنے پر غور وفکر کررہے ہیں۔

موصولہ اطلاعات کے مطابق ریاست کے وزیر داخلہ محمد محمود علی میں کورونا کی تشخیص ہوئی ہے۔ گزشتہ روز انہیں جبلی ہلز میں واقع اپولو ہسپتال منتقل کیا گیا تھا۔

ان کے قریب رہنے والے لوگوں کا کہنا ہے کہ محمد محمود علی کورونا کے تئیں لاپرواہی برت رہے تھے۔ اور بالاخر وہ اس کی زد میں آ ہی گئے۔

واضح رہے کہ چند دن قبل وزیر داخلہ کے سکیورٹی گارڈ کورونا سے متاثر پائے گئے تھے۔

وزیر داخلہ کے کورونا مثبت پائے جانے کے بعد ان کے اہل خانہ کو ہوم قرنطین کر دیا گیا ہے، دو دن قبل ان کا کورونا کا ٹیسٹ کیا گیا تھا، جس کی رپورٹ آج آئی ہے اور وزیر داخلہ کے دفتر کی جانب سے اس کی تصدیق بھی کی گئی ہے۔

آپ کو بتا دیں کہ گذشتہ دنوں ہریتا ہرم کے ایک پروگرام میں انہوں نے شرکت کی تھی جس میں پولیس کے اعلی افسران بھی شریک تھے۔

خیال رہے کہ ریاست تلنگانہ میں کورونا کے 14 ہزار کیسز ہیں، اس میں نو ہزار فعال کیسز ہیں، جبکہ یہاں ہلاکتوں کی مجموعی تعداد 247 تک جا پہنچی ہے۔