مدھیہ پردیش اسمبلی اجلاس کا آج سے آغاز ہوگا جبکہ جئے پور میں کیمپ کئے ہوئے کانگریس کے ارکان اسمبلی کل ہی بھوپال واپس ہوگئے۔
کمل ناتھ حکومت کو سیاسی بحران کا سامنا ہے۔ گورنر لال جی ٹنڈن نے ہفتہ کی رات دیر گئے وزیراعلی کمل ناتھ کو اسمبلی میں اعتماد کا ووٹ حاصل کرنے کی ہدایت دی تھی۔
گورنر کی ہدایت کے بعد اسپیکر این پی پرجاپتی نے ایوان میں اکثریت ثابت کرنے کا حکم دینے سے متعلق ایک سوال کو ٹال دیا جس کے بعد اب تمام کی نظریں اسپیکر پر مرکوز ہوگئی ہیں، اب دیکھنا یہ ہوگا کہ وہ گورنر کی ہدایت کے بعد فلور ٹسٹ کراتے ہیں یا نہیں۔
کانگریس لیجسلیچر پارٹی نے ہفتہ کو وہپ جاری کرتے ہوئے اپنے ارکان اسمبلی سے ایوان کے اجلاس میں موجود رہنے کی ہدایت دی ہے لیکن بی جے پی کے ارکان جو ہریانہ کی ایک ہوٹل میں رکے ہوئے ہیں وہ ابھی تک بھوپال نہیں پہنچے ہیں۔
