جج اے ایم خانولکر اور جج دنیش ماہیشوری کی گرمی کی چھٹیوں کی بنچ نے وکیل الکھ سریواستو کے دلائل سننے کے بعد آئی سی اے آئی کو نوٹس جاری کرکے پیر تک جواب تک مانگا۔ یہ عرضی انڈیا وائڈ پیرنٹس ایسوسی ایشن کی صدر کی طرف سے دائر کی گئی ہے۔
سماعت کے دوران آئی سی اے آئی کے وکیل نے دلیل دی کہ نوٹفکیشن سے کسی بھی طالب علم کے ساتھ امتیاز نہیں ہوتا ہے اور عرضی گزار کی اس سلسلہ میں غلط سوچ ہے۔
عرضی گزار نے 29جولائی سے 16اگست کے درمیان آئی سی اے آئی کی طرف سے منعقد ہونے والے سی اے کے امتحانات پر آپٹ آوٹ متبادل منسوخ کرنے کی مانگ کی ہے۔
آئی سی اے آئی نے سی اے کی جولائی میں ہونے والے امتحانات کے لئے آپٹ آوٹ کا اعلان کیا ہے۔ اس کے تحت امیدوار اگر چاہیں تو وہ جولائی کے امتحانات چھوڑ سکتے ہیں۔عرضی میں امتحانات مراکز کی تعداد بڑھانے کی مانگ کی گئی ہے جس سے یہ یقینی کیا جاسکے کہ ہندستان کے ہر ایک ضلع میں کم از کم ایک امتحان مرکز رکھا جائے۔
خیال رہے کہ جولائی مہینہ میں ہونے والے سی اے امتحانات کے لئے پورے ملک کے 259امتحانات مراکز میں چار لاکھ 67 ہزار امیدواروں کو شامل ہونا ہے۔
