کچھ لوگ کٹھوعہ ریپ کیس پر سیاست کر رہے ہیں: کانگریس

کانگریس کے ترجمان نے کہا کہ عدالت کا اس معاملے سے متعلق جلد فیصلہ سنانے سے بہت مثبت پیغام گیا ہے۔

آل انڈیا نیشنل کانگریس کے ترجمان راویندر شرما نے ای ٹی وی بھارت سے بات کرتے ہوئے کہا کہ جموں کے کٹھوعہ ریپ معاملے میں پٹھان کورٹ کی جانب سے دیے گئے فیصلے کا کانگریس پارٹی خیر مقدم کرتی ہے، کیونکہ یہ فیصلہ گواہوں اور ثبوتوں کی بنیاد پر سنایا گیا ہے۔

انہوں نے کہا کہ عدالت کا اس معاملے سے متعلق جلدی فیصلہ سنانا بہتر بات ہے کیونکہ ملک میں نابالغ بچیوں کے ساتھ جنسی زیادتی کے واقعات میں اضافہ ہورہا ہے۔

انہوں مزید کہا کہ ایسے مجرمین کو ہر گز معاف نہیں کیا جانا چاہیے تاکہ اس طرح کے واقعات کو روکا جاسکے، لیکن بد قسمتی سے کچھ لوگ اس پر سیاست کرتے ہیں جو کہ افسوس ناک ہے۔

واضح رہے کہ ڈسٹرکٹ اینڈ سیشنز کورٹ پٹھان کوٹ نے فیصلہ سناتے ہوئے 7 میں سے چھ ملزمین کو قصوروار قرار دیا ہے۔

جن ملزمین کو قصوروار قرار دیا گیا ہے ان کے نام سانجی رام، آنند دتہ، پرویش کمار، دیپک کھجوریا، سریندر ورما، تلک راج ہیں۔ جبکہ وشال نامی ملزم کو عدالت نے بری کردیا ہے۔

عدالت کے فیصلے کے بعد متاثرہ کے وکیل مبین فاروق نے کہا کہ انہیں امید تھی کہ کورٹ کا فیصلہ ان کے حق میں آئے گا۔

واضح رہے کہ کیس کی 'آن کیمرہ' اور روزانہ کی بنیادوں پر سماعت تقریبا ایک برس تک جاری رہنے کے بعد 3 جون کو ختم ہوئی تھی۔

ڈسٹرکٹ اینڈ سیشنز جج ڈاکٹر تجویندر سنگھ نے فیصلہ محفوظ کرتے ہوئے 10 جون کو فیصلہ سنانے کا اعلان کیا تھا۔