انگلینڈ کے خلاف ایشیز سیریز میں اپنی بہترین کارکردگی کی بدولت پلیئر آف دی سیریز کے خطاب سے نوازے گئے آسٹریلیائی بلے باز اسٹیو اسمتھ نے کہا ہے کہ انہیں فخر ہے کہ وہ ٹیم کے لیے بہترین کھیل کا مظاہرہ کرسکے۔
انگلینڈ نے ایشیز سیریز کے پانچویں اور آخری ٹیسٹ میچ کے چوتھے روز اتوار کو آسٹریلیا کو 135 رنوں سے شکست دے کر پانچ میچوں کی سیریز میں 2۔2 سے برابر کرلی، حالانکہ گزشتہ ایشیز کی فاتح ہونے کی وجہ سے اس مرتبہ بھی یہ ٹرافی آسٹریلیا کے پاس ہی رہے گی۔
میچ کے بعد اسٹیو استمھ نے کہا 'انہوں نے انگلینڈ کے لیے پچھلے چند مہینوں میں بہترین کھیل کا مظاہرہ کیا ہے، انہوں نے کہا کہ مجھے خوشی ہے کہ میں ٹیم کے لیے اچھا کھیل سکا، آپ کو اپنے اوپر بس بھروسہ ہونا چاہیے۔
میچ کے درمیانی اوورز میں وکٹ بلے بازی کے لیے عمدہ تھی، میتھیو ویڈ کریز پر ٹکے رہے اور انہوں نے ثابت کردیا کہ اگر آپ مضبوطی کے ساتھ کھڑے رہیں تو اس وکٹ پر اسکور کیا جاسکتا ہے، لیکن دیگر بلے باز ان کا ساتھ نہیں دے سکے۔
انگلینڈ کے تیز گیندباز اور پلیئر آف دی میچ کے خطاب سے نوازے گئے جوفرا آرچر کی تعریف کرتے ہوئے انہوں نے کہا 'میں نے گزشتہ برس آرچر کو آئی پی ایل میں کھیلتے دیکھا تھا، ان کے پاس اچھی گیندبازی کا ہنر ہے، آرچر کا مستقبل بے حد روشن ہے۔
انہوں نے کہا کہ آپ ہمیشہ ایک بہترین کھلاڑی کی حیثیت سے ابھرنا چاہتے ہیں، اس کے لیے آپ کو مسلسل مشقت کرنی ہوتی ہے اور ایسے ہی بہترین مظاہرہ کرتے رہنا ہے اور اپنی ٹیم کو فتح یاب کرانا ہے۔
واضح رہے کہ اس سیریز میں 774 رن بنانے والے اسمتھ کو انگلینڈ کے بین اسٹوکس کے ساتھ مشترکہ طور پر پلیئر آف دی سیریز منتخب کیا گیا ہے، اسمتھ نے ایشیز کے چار میچز میں 144، 142، 92، 211، 82، 80 اور 23 رنز بنائے۔
خیال رہے کہ اسمتھ کو مسلسل دوسری مرتبہ ایشیز سیریز میں كامپٹن ملر ایوارڈ سے سرفراز کیا گیا۔
