صدر جمہوریہ رامناتھ کووند نے بے شمار صلاحیتوں کے مالک معروف اداکار عرفان خان کے اچانک انتقال پر گہرے رنج و غم کا اظہار کیا ہے۔ کووند نے آج ٹوئٹ کرکے کہا کہ معروف اداکار عرفان خان کے اچانک انتقال سے گہرا دکھ ہوا ہے۔
وہ غیرمعمولی صلاحیتوں سے مالامال اداکار تھے۔ ان کے مختلف کرداروں کی چھاپ ہمیشہ ہمارے دلوں میں موجود رہے گی۔
انہوں نے مزید لکھا کہ ان کا انتقال سنیما دنیا اور لا تعداد مداحوں کے لئے ناقابل تلافی نقصان ہے۔ ان کے کنبہ اور رشتہ داروں کے ساتھ میری تعزیت۔
وزیر اعظم نریندر مودی نے معروف اداکار عرفان خان کے انتقال پر گہرے رنج وغم کا اظہار کرتے ہوئے کہا کہ وہ غیر معمولی صلاحیتوں سے مالا مال اداکار تھے۔ انہوں نے اپنی اداکاری سے لوگوں کو خوب محظوظ کیا۔ بھارتی عوام ان کی اداکاری کو کبھی نہیں بھلا پائے گی۔
کانگریس پارٹی کے سینئر رہنما راہل گاندھی نے ٹوئٹ کرکے کہاکہ عرفان خان کے انتقال کی خبر سن کر دکھ ہوا۔ بے شمار صلاحیتوں کے مالک وہ عظیم اداکار عالمی فلمی اور ٹی وی دنیا میں نہایت مقبول ہندستانی برانڈ ایمبسڈر تھے۔ ان کو کبھی بھولا نہیں جاسکے گا۔ دکھ کی اس وقت میں ان کے گھر والوں، دوستوں اور فین کے ساتھ اپنی ہمدردی کا اظہار کرتا ہوں۔
راجستھان کے وزیراعلی اشوک گہلوت نے عرفان خان کے انتقال پر سوشل میڈیا کے ذریعہ گہرا دکھ کا اظہار کرتے ہوئے کہا کہ وہ ملک کے بہترین اداکاروں میں سے ایک تھے، ان کے انتقال سے انہیں دکھ پہنچا ہے۔انہوں نے ان کی روح کی تسکین کے لیے دعا کی۔
دہلی کے وزیر اعلی اروند کیجریوال نے بالی ووڈ اداکار عرفان خان کے انتقال پر گہرے رنج و غم کا اظہار کرتے ہوئے کہا کہ ان کی اداکاری ہمیشہ موجب متحرک رہے گی۔
اپنی لاجواب اداکاری سے کروڑوں لوگوں کے چہیتے بننے والے عرفان کا بدھ کی صبح ممبئی میں 53 سال کی عمر میں انتقال ہو گیا تھا۔ وہ تقریبا دو سال سے کینسر میں مبتلا تھے۔
کیجریوال نے عرفان خان کے انتقال پر افسوس کا اظہار کرتے ہوئے ٹوئیٹ کیا، ”ہمارے وقت کی سب سے غیر معمولی اداکاروں میں سے ایک، عرفان خان کے انتقال کے بارے میں سن کر صدمے میں ہوں۔ ان کی اداکاری کو ہمیشہ یاد رکھا جائے گا، خدا ان کی روح کو شانتی دے“۔
ماسٹر بلاسٹر سچن تندولکر نے عرفان کو خراج عقیدت پیش کرتے ہوئے ٹویٹ کرکے کہا کہ عرفان کے انتقال کی خبر سن کر کافی دکھی ہوں۔ وہ میرے پسندیدہ اداکاروں میں سے ایک تھے اور میں نے تقریبا ان کی تمام فلمیں دیکھی ہیں۔ ان کی آخری فلم انگریزی میڈیم میں انہوں نے شاندار اداکاری کی تھی۔ خدا ان کی روح کو سکون فراہم کرے اور ان کے اہل خانہ کو غم برداشت کرنے کی طاقت دے۔
انڈین کرکٹ ٹیم کے کپتان وراٹ کوہلی نے کہا کہ عرفان کے انتقال کی خبر سے پریشان ہوں۔ان میں بے مثال صلاحیت تھی اور وہ اپنی اداکاری سے سب کے دلوں کو چھو لیتے تھے۔خدا ان کی روح کو سکون دے۔
سابق کرکٹر وریندر سہواگ نے ٹویٹ کرکے کہاکہ عرفان ایک بہترین اداکار اور بہترین صلاحیتوں کے مالک تھے۔ان کے اہل خانہ کے تئیں میں اپنی ہمدردی کا اظہار کرتا ہوں۔
