شعیب نے صرف ٹاپ نہیں کیا بلکہ وہ ملک اور اپنی آبائی ریاست کے پہلے ٹاپر بھی رہے جس نے صد فی صد نمبرات حاصل کرکے تاریخ رقم کردی۔ شعیب نے نیٹ کے امتحان میں 720 نمبرات میں سے 720 نمبرات لاکر کامیابی کی ایک نئی عبارت لکھ دی ہے۔
شعیب نے ریاست راجستھان کے کوٹہ سنٹر کے ایلن کوچنگ سنٹر سے این ای ای ٹی کی تیاری شروع کی۔ انہوں نے اپنے مقصد کو سامنے رکھا، بڑا خواب دیکھا اور وہ کر دکھایا جسے کرنے کا خواب ہر طالب علم دیکھتا ہے۔
شعیب نے میڈیا سے بات کرتے ہوئے اس کا اعتراف بھی کیا کہ انہوں نے اتنی بڑی کامیابی کی تمنا نہیں کی تھی لیکن انہوں نے ایک ہدف کا تعین کیا تھا اور اس کے لیے دن رات ایک کردی۔ شب و روز کی ان کی محنت رنگ لائی اور آج نتیجہ سب کے سامنے ہے۔
شعیب نے کہا کہ ان کے خاندان میں کوئی ڈاکٹر نہیں ہے۔ اس کا گھرانہ معاشی اعتبار سے کمزور تھا لیکن پڑھنے کا شوق اور جذبہ تھا۔ وہ ڈاکٹر بننے کا خواہاں تھا اور یہی خواب سجائے وہ کوٹہ پہنچا۔ کوٹہ آنے کے بعد اس کی کوچنگ کے ذمہ داران نے بھرپور مدد کی اور یہی وجہ ہے کو اس نے یکسوئی کے ساتھ تعلیم حاصل کرنے کی ٹھانی۔ اور کتابوں میں غرق ہوگیا۔
مزید پڑھیں:
نیٹ میں صد فیصد نمبرات لانے والے شعیب آفتاب نے تاریخ رقم کی
شعیب آفتاب نے مزید بتایا کہ کورونا کی وبا کو اس نے غنیمت جانا اور اپنے وقت کا صحیح استعمال کرکے منصوبہ بندی کی اور اپنے ہدف تک پہنچنے کے لیے سرگرداں رہا۔
