قومی دارالحکومت دہلی کے چاندنی چوک حلقہ اسمبلی میں کلاں محل میں واقع گورنمنٹ گرلز سینیئر سیکنڈری اردو میڈیم اسکول کو گذشتہ دنوں پٹودی ہاؤس گورنمنٹ گرلز سینیئر سکنڈری ہندی میڈیم اسکول میں ضم کیے جانے کے لیے ڈائریکٹر آف ایجوکیشن کی جانب سے ایک نوٹیفکیشن جاری کیا گیا تھا، جس کے بعد سے اردو داں طبقہ اس کی مخالفت کر رہا تھا۔
تاہم اس کے بعد ڈائریکٹر آف ایجوکیشن کی جانب سے کچھ مزید نوٹیفکیشن جاری کی گئیں، جس سے متعلق یہ بات واضح نہیں ہو پا رہی تھی کہ دہلی حکومت اردو میڈیم اسکول کو ضم کرنا چاہتی ہے یا نہیں اور کلاں محل کا اردو میڈیم اسکول ضم کیا جائے گا اس پر بھی تذبذب برقرار رہا۔
لیکن گذشتہ دنوں ڈائریکٹر آف ایجوکیشن کی جانب سے ایک نوٹیفکیشن جاری کیا گیا ہے جس میں اسکول کو ضم کیے جانے سے متعلق کہا گیا ہے کہ فی الحال کسی بھی اسکول کو ضم کیے جانے کی کوئی بھی تجویز نہیں دی گئی ہے۔
اسی سے متعلق ای ٹی وی بھارت کے نمائندے نے ایڈووکیٹ مسرور حسن صدیقی سے بات کی جس میں انہوں نے بتایا کہ ڈائریکٹر آف ایجوکیشن کی جانب سے جاری نوٹیفکیشن سے واضح ہو گیا ہے کہ اب اسکول کو ضم نہیں کیا جائے گا حالانکہ انہوں نے ضم ہونے سے روکنے کے لیے چاندنی چوک حلقہ اسمبلی ممبر پرہلاد سنگھ ساہنی اور لیفٹیننٹ گورنر انل بیجل کے ذریعہ بر وقت کی گئی کارروائی کو اس کامیابی کا حقدار بتایا۔
واضح رہے کہ کیجریوال کی دہلی حکومت کے دور اقتدار میں ہی گذشتہ برسوں میں اردو میڈیم اسکولوں کو ضم کیے جانے کے آرڈر جاری کیے گئے تھے، تاہم مخالفت ہونے کے بعد اسکول ضم کرنے کے فیصلے کو واپس لے لیا گیا تھا۔
