گاندھی خاندان نے یہ بھی واضح کیا ہے کہ پرینکا گاندھی بھی صدر نہیں بنیں گی۔
راہل گاندھی نے گذشتہ ورکنگ کمیٹی کی میٹنگ میں یہ بھی واضح کر دیا تھا کہ اس میں پرینکا گاندھی کو نہ گھسیٹا جائے جبکہ سونیا گاندھی پہلے ہی اپنی صحت کی وجہ سے اپنی سیاسی سرگرمیاں کم کر دی ہیں۔
کانگریس کے ذرائع کے مطابق پارٹی کا آئندہ صدر گاندھی خاندان کا نہیں ہوگا اور آئندہ دو مہینے میں نیا صدر منتخب کر لیا جائے گا۔
اب کانگریس میں ایسے ناموں پر غور کیا جا رہا ہے جس پر گاندھی خاندان کی بھی خاموش حمایت ہو اور وہ باقی کانگریس کے سینیئر رہنماؤں کو بھی قابل قبول ہوں تو کیا کانگریس کا اگلا صدر مہاراشٹر سے بنایا جائے گا؟
کئی سیاسی مبصرین کا کہنا ہے کہ یہ ممکن ہو سکتا ہے کیونکہ وہاں اسمبلی کے انتخابات جلد ہی ہونے والے ہیں اور ایک مہاراشٹرین صدر پارٹی کے لیے اچھا ہوگا۔
