جامعہ سے 101 طلباء نے پریلمز میں کامیابی حاصل کی

سول سروسز کے پریلمز امتحانات 2020 کے نتائج جاری کیے جا چکے ہیں یہ امتحان 4 اکتوبر کو منعقد کیا گیا تھا۔ اس برس خاص بات یہ رہی کہ جامعہ ملیہ اسلامیہ یونیورسٹی کے 101 طلباء نے اس امتحان میں کامیابی حاصل کی ہے۔

جامعہ ملیہ اسلامیہ کی ریسیڈینشل کوچنگ اکیڈمی سے پریلمز امتحان میں 283 طلباء نے شرکت کی تھی جس میں 101 طلباء نے کامیابی حاصل کی۔یہ تمام طلباء یو پی ایس سی کے مینز امتحان میں شامل ہوں گے ۔

اس موقع پر شیخ الجامعہ پروفیسر نجمہ اختر نے یو پی ایس سی کے پریلمز امتحانات میں کامیابی حاصل کرنے والے طلباء کو مبارکباد پیش کرتے ہوئے کہا کہ یونیورسٹی کی رہائشی کوچنگ اکیڈمی نے مستقل طور پر عمدہ کارکردگی کا مظاہرہ کیا ہے، جو جامعہ کے لیے بڑے فخر اور اطمینان کی بات ہے۔ ہم آنے والے برسوں میں اس سے بہتر نتائج کی توقع کرتے ہیں۔

جامعہ ملیہ اسلامیہ کی رہائشی کوچنگ اکیڈمی میں کوچنگ لینے والے طلباء میں سے 30 افراد کو سول سروسز امتحان 2019 میں منتخب کیا گیا تھا۔ جامعہ انتظامیہ کا دعویٰ ہے کہ یہ ملک کے کسی بھی عوامی کوچنگ سینٹر کا سب سے بڑا منتخب گروپ ہے۔گذشتہ برس منتخب ہوئے 30 امیدواروں میں سے 6 آئی اے ایس اور 8 آئی پی ایس بننے کی امید ہے۔ باقی امیدواروں کو ان کی درجہ بندی اور انتخاب کے مطابق آئی آر ایس، آڈٹ اور اکاؤنٹ سروسز کی دیگر خدمات حاصل ہوں گی۔سال 2010-11 میں اپنے آغاز سے لے کر 2019 تک جامعہ ملیہ اسلامیہ کے ریسیڈینشل کوچنگ اکیڈمی نے 230 سول آفیسر تیار کیے ہیں جن میں سے بہت سے آئی ایف ایس اور آئی پی ایس شامل ہیں۔ واضح رہے کہ ہر سال یو پی ایس سی کے ذریعہ سول سروس امتحانات تین مراحل میں منعقد کیے جاتے ہیں۔جن میں پریلمز، مینز اور انٹرویو ہوتا ہے۔

یو پی ایس سی نے ایک بیان میں کہا کہ پریلمز کے تمام کامیاب امیدواروں کے لیے سول سروسز کے مینز امتحانات 2020 کا فارم 28 اکتوبر سے 11 نومبر تک پو پی ایس سی کے ویب سائٹ پر جاری کردیا جائے گا۔اس میں کہا گیا کہ ڈی اے ایف - I کو بھرنے اور اسے جمع سے متعلق اہم ہدایات ویب سائٹ پر مہیا کردئیے گئے ہیں ۔ اس میں مزید کہا گیا کہ سول سروز مینز امتحانات 2020، 8 جنوری 2021 سے شروع ہوں گے۔